Қазақстан нарығына қытайлық Lepas автокөлік бренді келеді

Қазақстан автонарығына жаңа ойыншы қосылмақ.
Orbis Auto компаниясы Chery Holding Group құрамына кіретін Lepas бренді елде ресми түрде сатылымға шығатынын хабарлады.

Компания мәліметінше, жаңа брендтің Қазақстандағы сатылымы 2026 жылдың екінші жартысында басталады.

Lepas – Chery концернінің экспорттық нарықтарға бағытталған жеке бағыты. Көліктер LEX платформасында құрастырылады және бензинді қозғалтқыштардан бастап, гибридті және электрлі нұсқаларға дейін түрлі күштік қондырғылармен ұсынылады.

Жаңа бренд бұған дейін халықаралық автосалондарда таныстырылып, қазір Оңтүстік Америка мен Таяу Шығыс нарықтарына шығуда. Компания Қазақстанды Орталық Азиядағы негізгі хабтардың бірі ретінде қарастырып отыр.

Жергілікті нарықта Lepas бірнеше модельді, негізінен кроссоверлерді ұсынуды жоспарлап отыр. Алайда техникалық сипаттамалар, бағалар және дилерлік желі туралы нақты ақпарат кейінірек жарияланады.

Айта кетейік, Lepas атауы «leopard» (леопард), «leap» (серпіліс) және «passion» (құштарлық) сөздерінен құралған.