Қазақстан СІМ нің үндеуіне қарамастан, КҚК ға дрондар тағы да шабуыл жасады

Каспий құбыр консорциумының (КҚК) теңіз терминалы қайтадан дрондар шабуылына ұшырады. Шабуыл кезінде жүк тиеп тұрған азаматтық танкер зақымданды, деп хабарлайды «Нефть и газ Казахстана» каналы.

Оқиға алдыңғы екі танкерге жасалған дрон соққысынан кейінгі тәулікте болды. Бұл жолы Nelsa танкері ВПУ-1 айлағында тұрған кезде дрон оң жақ бортының артқы бөлігіне тікелей тиіп, үлкен өрт шықты.

Өртті бірнеше сағат бойы танкердің тиеу бригадасы мен КҚК құтқарушылары арнайы кемелердің көмегімен сөндірді.

КҚК ресми дерегінше, 22 адамнан тұратын халықаралық экипажды жедел түрде эвакуациялап үлгерген. Танкерде тек капитан мен оның бірінші көмекшісі қалған. Кеме суға батпағанымен, мұнай тиеу толық тоқтатылды. Жүк танктерінде жану немесе мұнай төгілуі болмаған.

Ахуал КҚК айналасында күрделене түсті. Бұған дейін Қазақстанның Сыртқы істер министрлігі ресми мәлімдеме жасап, азаматтық кемелер мен бейбіт инфрақұрылымға кез келген шабуылды тоқтатуға шақырған еді. Алайда бүгінгі оқиға дипломаттардың үндеуін елемей, соққылардың жалғасқанын көрсетті.

Кеше, 14:46