Қазақстан студенті Брюссельдегі референдумда ұлттық киіммен дауыс берді

Сайлау учаскесі Брюссель уақытымен таңғы сағат 7:00-де ашылды. Дауыс беру сайлау заңнамасы тәртібіне сәйкес басталды.

Бельгия мен Люксембургте тұрақты тұратын немесе осы елдерде уақытша жүрген Қазақстан азаматтары келесі мекенжай бойынша дауыс бере алады: Брюссель қаласы, Уккель коммунасы, Ван Бевер даңғылы, 30 үй.

Дауыс беру учаскесіне алғашқылардың бірі болып қазақстандық студент Арманжан Нарбеков (KU Leuven университеті) келді. Ол таңдауын ұлттық киім киіп жасауды жөн көрді.

- Мен үшін референдум бірінші кезекте азаматтық ұстанымымды білдіру және еліміздің тағдырына қатысты іске белсенді атсалысу мүмкіндігі.

Маған Бельгиядағы дауыс беру процесі қатты ұнады: бәрі жақсы ұйымдастырылған, ал елшілік қызметкерлері маған қалай дұрыс дауыс беру керектігі туралы кеңес берді.

Мен референдумға ұлттық киім – шапанмен келуді шештім, бұл менің отандастарыма құрметімді көрсету және сонымен бірге азаматтық борышымды мәдениетіміздің символын киіп орындау, - деп баяндады А.Нарбеков Kazinform-ға.

Брюссельдегі сайлау учаскесі шамамен 200 қазақстандық сайлаушыны қабылдауды жоспарлап отыр. Олардың арасында қазақстандық дипломаттар мен олардың отбасы мүшелері, еуропалық мекемелерде аккредиттелген тілшілер, шығармашылық интеллигенция, ғылыми қауымдастық, бизнес өкілдері және студенттер бар.

Сайлау туралы заңнамаға сәйкес, Брюссельдегі дауыс беру Орталық Еуропа уақытымен кешкі сағат 20:00-ге дейін жалғасады.

Осыған дейін референдумның Түркияда қалай өтіп жатқанын жаздық.