Қазақстан ЖИ ді енгізуде үздік 30 елдің қатарына енді

Қазақстан жасанды интеллектті енгізу деңгейі бойынша әлемнің алғашқы 30 елінің қатарына кірді. Бұл туралы OpenAI делегациясының елімізге сапары барысында белгілі болды.

Премьер-Министрдің орынбасары – Жасанды интеллект және цифрлық даму министрі Жаслан Мәдиев пен OpenAI өкілдері кездесуінде ЖИ саласындағы ынтымақтастық, білім беру бастамалары және ChatGPT Edu құралдарын енгізу мәселелері талқыланды.

OpenAI сарапшыларының деректеріне сәйкес, Қазақстан Орталық Азия елдері арасында көш бастап тұр: Қырғызстан 52-орында, Өзбекстан 58-орында. Бұл қоғамның жаңа технологияларды қабылдауға және күнделікті өмірде қолдануға дайын екенін көрсетеді.

Жаслан Мәдиевтің айтуынша, азаматтар жасанды интеллектті білім алу, жұмыс міндеттерін орындау, ақпарат іздеу және контент жасау үшін белсенді пайдаланып отыр. Бұл білім беру мен мемлекеттік басқаруда ЖИ-ді кеңінен қолдануға негіз қалайды.

OpenAI білім беру бағытының жетекшісі Валери Фокке Қазақстанда жастардың ЖИ-ді белсенді қолданатынын атап өтті. 18–34 жас аралығындағы пайдаланушылар барлық сұраныстардың 72%-ын құрайды.

Ұлттық жоба аясында еліміздегі 165 мың педагог ChatGPT Edu нұсқасына қол жеткізеді. Жобаның технологиялық серіктесі – Bilim Group IT-холдингі, ол OpenAI шешімдерін оқу процесіне енгізумен және әдістемелік тәжірибелерді әзірлеумен айналысады.

Осылайша, Қазақстан жасанды интеллектті енгізу бойынша өңірлік көшбасшы ретінде өз позициясын нығайтып келеді.

Бүгін, 14:11