Қазақстанда ішімдік бейнесі бар сурет үшін дәмханаға айыппұл салына бастады

Қазақстандағы қоғамдық тамақтану орындары әлеуметтік желілерде алкоголь бейнеленген жазбалар жариялағаны үшін айыппұлдарға тап болуда, деп хабарлайды Otyrar телеарнасы.

Тіпті жазбаларда баға көрсетілмесе және сатып алуға тікелей шақыру болмаса да, мұндай контент алкоголь өнімінің жарнамасы деп танылуы мүмкін.

Ресторандар мен дәмханаларға сусындардың атауын атамауға, брендтерді көрсетпеуге және бар сөресі, бөтелкелер мен бокалдар бейнеленген фото-видеолардан бас тартуға кеңес беріледі. Сондай-ақ алкогольді жүлде ретінде ойнатуға, онлайн форматта алкоголь мәзірін жариялауға тыйым салынады.

Мұндай бұзушылықтар Қазақстан Республикасының Әкімшілік құқық бұзушылық туралы кодексінің 455-бабына («Жарнама туралы заңнаманы бұзу») жатады. Бұл үшін бизнеске қомақты айыппұл салынады. Сонымен қатар, мекеменің барлық контенті: жазбалар (пост), сторис және тіпті архивтегі ескі жарияланымдар да тексерілуі мүмкін.

Мамандар мекеме иелеріне әлеуметтік желідегі парақшаларын қайта қарап шығуды және санкцияларға тап болмау үшін күмәнді материалдарды өшіріп тастауды ұсынады. Сарапшылардың айтуынша, алкоголь жарнамасы саласындағы реттеу шаралары бұдан былай қатая түспек, ал онлайн-контент үшін жауапкершілік іс жүзінде офлайн-жарнамамен теңестірілген.

«Брендтерді көрсетуге, атауларын жазуға, ұтыс өткізуге, ішімдік тізімі бар мәзірді жариялауға болмайды. Тіпті фондық режимдегі бөтелкенің өзі — үлкен қауіп. Тексерушілер бәрін: посттарды, стористерді және архивті де қарайды», — деп атап өтті өзін-өзі реттейтін ҚР Қоғамдық тамақтану  ұйымының өкілдері.

Бүгін, 09:34