Қазақстанда медицина қызметкерлерін сақтандыру: Денсаулық сақтау министрлігі не ұсынады

Қазақстанның Денсаулық сақтау министрлігі медицина қызметкерлерін сақтандырумен қорғауды, жұмыс кезінде зорлық-зомбылықтан зардап шеккен дәрігерлерге төлем жасауды, сондай-ақ дәрігерлердің, пациенттердің, медициналық ұйымдар мен сақтандырушылардың өзара іс-қимылының жаңа қағидаларын көздейтін бұйрық жобасын әзірледі. Тиісті құжат "Ашық НҚА" порталында жарияланды, деп хабарлайды Tengri Health.

Медицина қызметкерлерін сақтандыруда не өзгереді?

Құжатқа сәйкес, бұйрық жобасы медицина қызметкерлерінің кәсіби жауапкершілігін, сондай-ақ олардың кәсіби міндеттерін орындау кезіндегі өмірі мен денсаулығын сақтандыруды жетілдіруге бағытталған.

Денсаулық сақтау министрлігі жаңа ережелер медицина қызметкерлерінің әлеуметтік және құқықтық қорғалуын арттырып, сонымен бірге пациенттерді қорғау тетіктерін жақсартуы тиіс деп санайды.

Ұсыныстардың бірі - медицина қызметкерлерінің кәсіби міндеттерін атқару кезіндегі өмірі мен денсаулығын бірлесіп сақтандырудың үлгілік шартын енгізу.

Жоба кәсіби жауапкершілікті сақтандыру аясын кеңейтуді қарастырады. Ол тек қазіргі уақытта жұмыс істеп жатқан дәрігерлерге ғана емес, сонымен қатар оқу кезіндегі дәрігер-интерндер мен дәрігер-резиденттерге де қолданылуы тиіс.

Дәрігерлерді жұмыс орнындағы зорлық-зомбылықтан да қорғамақ

Жобада медицина қызметкерінің өміріне немесе денсаулығына зиян келтірілгеннен кейін сақтандыру төлемін ала алатын жағдайлары жеке көрсетілген. Бұл ретте оның жұмыс барысында басқа адам тарапынан жасалған зорлық-зомбылық әрекеттерінен зардап шеккен кездері де қамтылған.

Жоба маманның кәсіби жауапкершілігін бірлесіп сақтандыру шарттарын жасасу және орындау қағидаларын өзгертеді.

Құжат авторлары мыналарды ұсынады:

"Сақтандыру төлемдерін жүзеге асыру тәртібін және денсаулық сақтау субъектілері, медицина қызметкерлері, пациенттер мен бірыңғай сақтандыру (қайта сақтандыру) пулының әкімшісі арасындағы өзара іс-қимылды жетілдіру".

Бұл медиктер мен пациенттерге не береді?

Денсаулық сақтау министрлігі жаңа тетіктер жұмыс кезінде медицина қызметкерлерінің, соның ішінде дәрігер-интерндер мен дәрігер-резиденттердің қорғалуын арттырып, денсаулық сақтау жүйесіне қатысушылар үшін құқықтық және қаржылық тәуекелдерді азайтады деп күтеді.

"Жобаның мақсаты - пациенттерді, медициналық ұйымдар мен медицина қызметкерлерін сақтандырумен қорғаудың кешенді жүйесін қалыптастыру", - делінген құжатта.

Жоба авторларының пікірінше, жаңа ережелер:

медицина қызметкерлерінің әлеуметтік және құқықтық қорғалуын арттыруға, олардың кәсіби жауапкершілігін сақтандыруды жақсартуға, медициналық қызмет нәтижесінде пациенттердің өміріне немесе денсаулығына зиян келген жағдайда оларға сақтандыру төлемдерін қамтамасыз етуге тиіс.

Қоғамдық талқылау 2026 жылғы 16 қыркүйекке дейін жалғасады.

Google News арқылы жаңалықтарымызды қадағалаңыз

Жазылу

Денсаулық сақтау министрлігі

дәрігер

дәрігерлер

шабуыл