Қазақстанда мұғалімдерге жасанды интеллект ассистенттері енгізіледі

Қазақстанда білім беру саласына жасанды интеллектті енгізу бойынша ауқымды жоба басталуда. Оқу-ағарту министрлігі ChatGPT Edu пилоттық жобасын іске қосуға дайындық жүргізіп жатыр.

2026 жылы бұл бастамаға 200 мың педагог қатысып, күнделікті жұмысын жеңілдету үшін жасанды интеллект құралдарын қолдануды үйренеді.

Мемлекет басшысының тапсырмасына сәйкес, білім беру жүйесінде цифрлық жаңғырту жүріп жатыр. QazTech платформасы негізінде Ұлттық білім беру дерекқоры жаңартылып, электронды күнделіктер үшін бірыңғай қоймаға айналады. Сонымен қатар барлық сервистер мен мемлекеттік қызметтерді біріктіретін Ұлттық білім беру платформасы құрылмақ.

Жобаның басты мақсаты – ChatGPT Edu арқылы оқыту сапасын арттыру, мұғалімдердің тиімділігін күшейту және зерттеу әлеуетін дамыту. Меморандум аясында министрлікке 100 мың лицензия бөлінді: 5 мыңы – мектепке дейінгі ұйымдарға, 85 мыңы – орта білім беру мекемелеріне, 10 мыңы – колледждерге. Жылдың екінші жартысында тағы 100 мың педагогке лицензия ұсынылады.

Әрбір мұғалім өзіне арналған «ақылды ассистентке» ие болады. ChatGPT Edu бірнеше минут ішінде сабақ жоспарын әзірлеуге, тапсырмалар мен тесттер құрастыруға, оқу материалдарын қазақ, орыс және ағылшын тілдерінде бейімдеуге мүмкіндік береді. Сонымен қатар күрделі тақырыптарды қарапайым тілмен түсіндіруге, сабақ форматын пікірталасқа немесе жобаға айналдыруға көмектеседі.

Жүйе бағалау критерийлерін дайындауға, оқушылардың жұмыстарын алдын ала талдауға және жеке кері байланыс жасауға қолдау көрсетеді. Қорытынды бағаны әрқашан педагогтың өзі қояды. Платформа мұғалімдердің кәсіби дамуына да жол ашады: олар жаңа әдістемелерді меңгеріп, оқу курстарын жаңартып, цифрлық тәжірибелерді игере алады.

Бүгін, 13:09