Қазақстанда оңайлатылған салық мөлшерлемесін бірыңғайлау ұсынылды нақты сан аталды

Құрылтайда түрлі облыстардағы оңайлатылған декларация бойынша салық мөлшерлемелерінің айырмашылығы және өңірлер арасында бизнестің ықтимал көшу мәселесі көтерілді. Депутат Дәурен Ахметжаев бүкіл Қазақстан бойынша оңайлатылған режим үшін бірыңғай мөлшерлеме белгілеуді ұсынды, - деп хабарлайды Tengrinews.kz тілшісі.

Мәселенің мән-жайы неде?

2026 жылдың 1 қаңтарынан бастап Қазақстанда жаңартылған Салық кодексі күшіне енді. Оған сәйкес, оңайлатылған режимдегі шағын бизнес үшін базалық мөлшерлеме – 4 пайыз. Дегенмен, жергілікті мәслихаттарға оны ±50 пайызға, яғни 2-ден 6 пайызға дейін өзгертуге рұқсат берілді.

Нәтижесінде, депутаттың айтуынша, айтарлықтай теңсіздік туындаған:

Бір өңірде кәсіпкерлер небәрі 2 пайыз төлейді. Ал көрші аймақта – 6 пайыз, яғни дәл сол бизнес түрі үшін 3 есе артық төлеуге мәжбүр.

Осы тұста бизнестің аудандардан "қашуы" басталады. Кәсіпкерлер өз фирмаларын салық төмен жерлерге қайта тіркей бастайды. Мысалы, сұранысқа емес, салықтық тиімділікке басымдық беріп, ауылдар мен моногородалардан облыс орталықтарына кетеді.

"Кәсіпкерлер басқа өңірге көшсе, бұрын жұмыс істеген елді мекенде салық түсімі азайып, кәсіпкерлік белсенділік төмендеуі мүмкін. Сондықтан салық саясаты кәсіпкерлерге өз өңірінде бизнес ашып, оны дамытуға қолайлы жағдай жасауы тиіс", – деді депутат.

Депутат не ұсынады?

Премьер-министрдің орынбасары, Ұлттық экономика министрі Серік Жұманғариннің атына жолдаған депутаттық сауалында Дәурен Ахметжаев бүкіл ел бойынша оңайлатылған декларация негізіндегі арнайы салық режимі үшін 2–3 пайыздық бірыңғай мөлшерлемені бекітуді және мәслихаттардың оны көтеру немесе төмендету құқығын алып тастауды ұсынады.

Сонымен қатар, ревизия жүргізуді ұсынды. Мөлшерлемелердегі айырмашылыққа байланысты қанша кәсіпкердің бизнесін басқа өңірлерге көшіріп үлгергенін тексеру қажет. Бизнес "салық арзан" жерде емес, сұраныс пен инфрақұрылым бар жерде дамуы үшін Салық кодексіне түзетулер енгізу керек.

Бұған дейін Құрылтайда Салық реформасына баға беру талап етілген болатын. Мәселе соңғы жарты жылда Қазақстанда 200 мыңға жуық бизнес нысанының жабылып қалуында. Мұның себебі неде болуы мүмкін және депутаттар не істеуді талап етті, толығырақ - мына жерде.

Бізді Google-дың негізгі дереккөздер тізіміне қосыңыз

Қосу