Қазақстанда Stadler вагондарын қарашада іске қосуға уәде берді: алғашқы бағыттар аталды

Қазақстанда Stadler вагондары қараша айында іске қосылады деп жоспарлануда, деп хабарлайды Tengri Travel.

Көлік вице-министрі Мақсат Қалиақпаров Үкіметте өткен брифингте журналистердің сауалдарына жауап берді.

"Осы айда 106 вагонды іске қосамыз. Нақты күні әзірге белгісіз", - деді ол.

Оның мәліметінше, жаңа вагондарды елорда мен Алматыдан шығатын бағыттарға жіберу жоспарланған: аталған бағыттардың ішінде Астана - Алматы және Қызылорда бар.

Қалиақпаровтың айтуынша, Stadler вагондарына қызмет көрсету әзірге екі қалада - Астана мен Алматыда ұйымдастырылған.

Сондай-ақ вице-министр пайдалану мерзімі 25 жылдан асқан 250-ге жуық вагон кезең-кезеңімен қолданыстан шығарылатынын мәлімдеді.

Оларды сату немесе есептен шығару мәселесін ұлттық тасымалдаушы шешеді. Ал Talgo құрамдары қатынауын жалғастыра береді.

Қостанай бағытындағы пойыздар туралы сауалға Қалиақпаров вагондарды жаңарту жұмыстары жүріп жатқанын айтып жауап берді. Ол кейбір бағыттарда вагондарды жеке тасымалдаушы сатып алатынын нақтылады.

Stadler компаниясымен жасалған келісімшарт 2030 жылға дейін 557 жолаушылар вагонын шығаруды қарастырады. Бастапқыда алғашқы партияны тасымалдаушыға 2025 жылдың соңына дейін өткізу жоспарланған болатын, ал жаңа құрамдар төрт бағыт бойынша қатынауы тиіс еді: Астана - Алматы, Астана - Семей, Астана - Шымкент және Астана - Атырау.

2025 жылдың мамырында жаңа Stadler вагондары Talgo-ның орнын басатыны хабарланған болатын. Сонымен қатар ескі Talgo құрамдарын мерзімінен бұрын есептен шығармау туралы шешім қабылданды: олар қызмет ету мерзімі аяқталғанша жұмысын жалғастырады.

Stadler вагондарын іске қосу мерзімі бірнеше рет: алдымен вагондар 2025 жылдың соңында күтілсе, кейін 2026 жылдың көктемі мен жазына ауыстырылды. Қыркүйек айында көлік вице-министрі алдын ала мерзім ретінде қазанның соңы - қарашаның басын атаған болатын.

Мерзімдердің шегерілуі сынақтар кезінде анықталған ескертулерден кейін, соның ішінде қауіпсіздік талаптары бойынша қосымша тексерулердің жүргізілуімен түсіндірілді.

Қыркүйек соңына қарай "Жолаушылар тасымалы" АҚ теңгеріміне 75-тен аса Stadler вагоны қабылданды. Компания сол кезде құрамдардың пайдалануға дайындалып жатқанын, ал жолсеріктердің қосымша дайындықтан өтіп жатқанын хабарлады.

Бізді Google-дың негізгі дереккөздер тізіміне қосыңыз