Қазақстандық 500 ге жуық ғалым шетелде еңбек етіп жүр

Ғалымдар ғылыми орталықтарда, оқу орындары мен зертханаларда жұмыс істейді. Олардың дені – жастар. 

Мемлекет басшысының жас ғалымдарды елге тартып, олардың әлеуетін пайдалануға қатысты тапсырмасы бар. Соған сәйкес кейінгі бес жылда 50-ге тарта білікті маман елге оралды. Бұл туралы бүгін Алматыда басталған ІІ Халықаралық жас ғалымдар конгресінде айтылды. Жиынға жер, ғарыш, агробизнес, коммуникация секілді салаларды зерттеушілер қатысты. 100-ге тарта маман шетелден арнайы келді. 

Конгресте өзге елдерде табысты қызмет атқарып жүрген қазақстандық жас ғалымдардың әлеуетін пайдалану, олардың еңбегіне қоғам назарын аудару сияқты мәселелер қаралды. Пленарлық секциялар бірнеше жоғары оқу орындарында жалғасады. Қазір әлемде талантты жастарға сұраныс көп. Әр мемлекет олардың ақыл-ойын қоғам игілігіне пайдалануға ұмтылады. 

Қуантар Әлиханов, ҚР Президенті жанындағы ҰҒА ғылым орталығының директоры:

- Зертханаларды және қолайлы жұмыс орындарын дайындап беруіміз керек. Екінші, әлеуметтік жағдайын, тұратын тұрғын үйі және шетелдік деңгейде жалақысы болуы керек. Үшінші, оның ғылыми мектебі бар. Сол ғылыми мектепті қалыптастыру үшін жағдай жасау керек. Ол жерде нормативтік құжаттық актілерге өзгеріс енгізу керек. Негізі осы 3-4 мәселені шешетін болсақ, шетелден талантты жас ғалымдарды тартуға болады. Оған арнайы министрліктен концепция әзірленуде.

Мұхит Құлмағанбетов, Көз және көруді зерттеу орталығының кванттық оптика зертханасының меңгерушісі:

- Мен өзім Ұлыбританияда докторонтура оқыдым. Одан кейін Канада және Гонконгта осы кванттық зерттеулермен айналысып офтальмология саласына қандай технологиялары алып келе аламыз, адамның соқырлығының алдын алу үшін қандай шешімдер қабылдай аламыз деген сияқты зерттеулерді соңғы кезде жасап жатырмыз.