Қазақстандықтардың банктер алдындағы қарызы 25 трлн теңгеден асты

Қазақстанда халықтың банк алдындағы берешегі қарқынды өсіп, 25 трлн теңгеден асты. Бұл туралы Қазақстан Ұлттық банкі мәлімдеді.

2026 жылғы сәуірдегі жағдай бойынша елдегі жалпы несие көлемі 43,4 трлн теңгеге жеткен. Соңғы айда бұл көрсеткіш 201 млрд теңгеге артқан.

Өсімнің негізгі драйвері – халық. Азаматтардың банктерге қарызы 25,07 трлн теңгені құрап, бір айда 131,5 млрд теңгеге көбейген. Ал бизнеске берілген несиелер көлемі 18,34 трлн теңге болып, өсім 70 млрд теңгені құрады.

Сарапшылардың айтуынша, соңғы жылдары халық пен бизнес арасындағы несие алшақтығы айтарлықтай ұлғайған. Мәселен, 2022 жылдың басында екі сегменттің көрсеткіштері шамалас болған – әрқайсысы шамамен 10 трлн теңге деңгейінде еді.

Халық қарызының құрылымында тұтынушылық несиелер басым. Азаматтар түрлі сатып алулар үшін 16,85 трлн теңге қарыз алған. Ал ипотекалық несиелер көлемі 7,08 трлн теңгені құрайды.

Несиелердің басым бөлігі ұлттық валютада рәсімделген. Теңгедегі қарыз көлемі 25,06 трлн теңге болса, шетел валютасындағы берешек небәрі 2,4 млрд теңгені құрайды.

Ал бизнес сегментінде негізгі қарыз алушылар – ірі компаниялар. Олардың үлесіне 8,67 трлн теңге тиесілі. Шағын бизнес 6,58 трлн теңге, ал орта бизнес 3,09 трлн теңге көлемінде несие алған.

Сонымен қатар кәсіпорындар валюталық қарыздарды жиі пайдаланады. Жалпы 18,34 трлн теңгелік бизнес несиесінің 5,33 трлн теңгесі шетел валютасында берілген.

Сарапшылар халықтың тұтынушылық несиелерге тәуелділігінің артуы қаржы тұрақтылығы үшін тәуекелдер туындатуы мүмкін екенін ескертеді.