Қазақстанның шорт тректен ұлттық құрамасының көшбасшысы Абзал Әжғалиев спорттық мансабын аяқтайтынын мәлімдеді

Қазақстанның қысқы спортындағы ең жарқын өкілдердің бірі, Олимпиада ойындарына төрт рет қатысқан Абзал Әжғалиев кәсіби спорттағы мансабын аяқтайтынын мәлімдеді. Бұл туралы шорт-трекші әлеуметтік желідегі парақшасында хабарлады.

Әжғалиевтің шорт-тректегі спорттық жолы 24 жылға созылды. Оның ішінде 2009 жылдан бері ол ұлттық құрама сапында ел намысын абыроймен қорғап келді.

«Әр спортшының өмірінде жаңа кезеңге қадам басатын уақыт келетін сәт болады. Мен үшін бұл кезең қазір басталды. Менің келесі мақсатым – жинақтаған тәжірибем мен білімімді Қазақстан спортын дамытуға бағыттап, жас спортшыларға көмектесу. Менің спорттағы миссиям аяқталған жоқ — ол тек жаңа деңгейде жалғасады», — деді спортшы.

Негізгі жетістіктері мен спорттағы мұрасы:

Төрт Олимпиада: Қазақстан атынан Сочи-2014 (5-орын), Пхёнчхан-2018 (6-орын), Бейжің-2022 (медальға бір қадам қалды — 500 метр қашықтықта 4-орын) және Милан-2026 (ширек финал) Олимпиада ойындарына қатысты.

Капитан әрі көшбасшы: 2018 және 2022 жылдары Олимпиада ойындарының ашылу салтанаттарында Қазақстан ұлттық құрамасының туын алып шығу құрметіне екі рет ие болды.

Тарихи жетістік: 2016 жылы 500 метр қашықтықта әлем кубогының кезеңінде Қазақстан тарихындағы алғашқы алтын медальді жеңіп алды.

Марапаттары: Қазақстанның бірнеше дүркін чемпионы, Азия ойындарының жүлдегері, сондай-ақ 2025 жылғы Азия ойындарында ерлер арасындағы эстафетада алтын медаль иегері.

Абзал Әжғалиев спортпен қоштаспайтынын және алдағы уақытта ұлттық құрама құрылымында тәлімгер әрі спорт функционері ретінде жұмысын жалғастыруды жоспарлап отырғанын атап өтті.

Бүгін, 10:40