Қазтеміртранс Алматы филиалы директорының ұсталуына қатысты түсініктеме берді

Компанияның мәліметінше, қазіргі уақытта құқық қорғау органдары тиісті тергеу іс-шараларын жүргізіп жатыр. «Қазтеміртранс» уәкілетті органдарға жан-жақты қолдау көрсетіп, тергеу аясында барлық қажетті ақпарат пен құжаттарды ұсынып отырғанын хабарлады.

Сонымен қатар, компания филиал нысандарын күзету бойынша мемлекеттік сатып алуда жеңіске жетуге көмектескені үшін ірі көлемде заңсыз сыйақы алды деген ақпарат күмән тудыратынын мәлімдеді.

«Қазтеміртранс» дерегінше, қазіргі уақытта күзет қызметтерін көрсетуге қатысты компания мен күзет ұйымдары арасындағы барлық келісімшарт жасалып, рәсімдер толық аяқталған.

Анықтамаға сәйкес, күзет қызметтеріне арналған компанияның жалпы бюджеті шамамен 200 млн теңгені құрайды. Ал Алматы филиалы бойынша биыл өндірістік базаларды күзетуге 9 млн теңгеден астам қаражат бөлінген. Компания бұл сома ақпарат кеңістігінде тараған ықтимал пара мөлшерінен бірнеше есе аз екенін атап өтті.

Сондай-ақ компания заңдылық, ашықтық және сыбайлас жемқорлықтың кез келген көрінісіне мүлдем төзбеушілік қағидаттарын ұстанатынын мәлімдеді. Егер заң бұзу фактілері дәлелденсе, заңнамаға сәйкес барлық шара қабылданатыны айтылды.

Компания істің барлық мән-жайы жан-жақты әрі объективті түрде зерттеледі деп үміттенетінін жеткізді.

Қазіргі уақытта «Қазтеміртранс» қалыпты режимде жұмыс істеп, өндірістік міндеттерін және серіктестер мен клиенттер алдындағы міндеттемелерін орындауды жалғастырып жатыр.

Тергеу нәтижелері туралы қосымша ақпарат белгіленген тәртіппен жарияланатыны хабарланды.

Бұға дейін Қазтеміртранстың 4 қызметкері пара алғаны үшін сотталғаны туралы жазғанбыз.