Қоғамдық орындарда тұмшаланып киінгендер жауапқа тартылмақ

Магеррамовтың айтуынша, жол қозғалысына қатысушыларды, азаматтарды, сондай-ақ жалға берілетін электр самокаттары жүргізушісінің құқыққа қайшы әрекеттерінен балаларды қорғау үшін электр қуатымен жүретін самокаттар мен оны пайдаланушыларға қатысты азаматтық-құқықтық жауапкершілікті міндетті сақтандыру және тіркеу нөмірі қажет көлік құралдарының қатарына қосу қажет. Мұндай талаптар орындалмаған жағдайда жол қозғалысына қатысуға рұқсат берілмейді, яғни құқыққа қайшы болып есептеледі.

Сондай-ақ, депутат көлік құралдарын басқару құқығынан айырылған немесе мұндай құқығы жоқ адамдарға электр самокатпен жолдың жүру бөлігінде басқаруға жол берген үшін әкімшілік жауапкершілік енгізілетінін алға тартты.

«Бұл нормаларды енгізу жүргізу мәдениетін қалыптастыру қажеттілігінен туындайды. Әр адам өз өмірі мен айналасындағы адамдардың қауіпсіздігі үшін жауапкершілікті сезінуі керек», – деді Магеррамов.

Сонымен қатар, заң жобасында қоғамдық орындарда бетті тануға кедергі келтіретін киім-кешекті кию бойынша салынған тыйымды бұзғаны үшін әкімшілік жауапкершілік енгізіледі.

«Бірінші құқық бұзушылық үшін «ескерту», қайталап бұзғаны үшін 10 АЕК көлемінде айыппұл салу көзделген», – деп атап өтті Магеррамов.

Балалардың құқықтарын қорғау мәселесіне де ерекше назар аударылды. Мысалы, жергілікті мемлекеттік басқару құрылымында Балалардың құқықтарын қорғау жөніндегі өңірлік уәкілетті орган, сондай-ақ аудандарда, облыстық маңызы бар қалаларда, Республикалық маңызы бар қалаларда және Астанада бұл уәкілетті органға есеп беретін және бақылауындағы бөлімдер құрылады.

Барлық мемлекеттік органдар балалардың құқықтарын бұзу, сондай-ақ оларға қатысты әкімшілік немесе қылмыстық құқық бұзушылықтар жасау фактілері мен тәуекелдері туралы Балалардың құқықтарын қорғау жөніндегі өңірлік уәкілетті органды дереу хабардар ететін болады.

«Балалардың құқықтарын қорғау жөніндегі уәкілетті орган қызметкерінің заңды қызметіне кедергі келтіргені үшін де әкімшілік жауапкершілік енгізіледі», – деп сөзін түйіндеді депутат Магеррам Магеррамов.

Енді заң Парламент Сенатына қарауға жіберіледі.