Қостанай облысында 4 365 педагог кітап оқу марафонында 15 кітап оқыды

Қостанай облысындағы 15 кітаптан оқыған 4,3 мыңнан астам педагог «Кітап оқитын педагог» байқауының бірінші (мектепішілік) іріктеу кезеңінен онлайн-тест тапсырды. Байқау 2026 жылғы 17 наурызда өтті және өңірде кітап оқу мәдениетін дамытуға бағытталған ауқымды бастаманың маңызды қадамы болды, – деп хабарлайды Aikyn.kz.

«Кітап оқитын ұлт» жобасы 2025 жылдың қыркүйегінен бастап бірнеше өңірде, соның ішінде Қостанай облысында пилоттық режимде іске қосылған. Жоба Қазақстан Республикасы Президенті Қасым-Жомарт Тоқаевтың кітап оқитын ұлтты қалыптастыру бастамасы аясында жүзеге асырылуда. Мақсаты – халықтың барлық топтары арасында тұрақты кітап оқу әдетін қалыптастыру, сыни ойлауды дамыту және кітапты білімнің негізгі көзі ретінде насихаттау.

«Кітап оқитын педагог» бағыты мектеп және колледж мұғалімдеріне арналған. Қатысушылар қазақ, орыс және шетел әдебиетінен ұсынылған 15 шығарма бойынша тест тапсырды. Байқау екі лигада – қазақ және орыс тілдерінде өткізілді.

Қостанай облысында іріктеу кезеңіне облыстың барлық 20 ауданы мен қаласынан 4 365 педагог қатысты. Оның ішінде 1 549-ы қазақ лигасында, 2 816-сы орыс лигасында. Онлайн-тест педагогтерге өз білімдерін терең көрсетуге мүмкіндік берді.

Кезең жеңімпаздары диплом, сертификат алды және аудандық, облыстық байқауларға қатысуға жолдама иеленді. Олардың қатарында Жітіқара политехникалық колледжінің арнайы пәндер оқытушысы Фариза Ерсаиновна Токкабулова бар.

«Кітап оқитын ұлт» жобасына қатысу мен үшін шығармашылық жаңалық болды. Бұл қазіргі заманда кітап оқудың рөлін жаңаша түсінуге, қабілетімді ашуға және әріптестерімді шабыттандыруға мүмкіндік берді. Диплом алу – мен үшін зор құрмет әрі алға басуға үлкен ынталандыру. Ұйымдастырушыларға кітап оқу мәдениетін насихаттауға бағытталған осындай маңызды бастама үшін алғыс айтамын», – деді ол. 

Қостанай қаласының №31 орта мектебінің қазақ тілі мен әдебиеті пәні мұғалімі  Ляззат Темірханқызы Садуақасова.

«Осындай байқауға қатысу мен үшін үлкен тәжірибе және шынайы шабыт болды. Қазақ тілі мен әдебиеті мұғалімі ретінде кітаптың жас ұрпақ тәрбиесіндегі ерекше рөлін жақсы түсінемін. Бұл жоба маған өз білімімді тереңдетумен қатар, оқушыларда кітап оқуға деген қызығушылықты арттырудың жаңа әдістерін үйренуге мүмкіндік берді. Әр кезең өзімді сынап, кәсіби тұрғыда өсуге жол ашты. Ең маңыздысы – жоба ұстаздарды ортақ құндылық төңірегінде біріктірді және кітап арқылы рухани байытуға ықпал етті. Кітап оқитын педагог – кітап оқитын ұлттың негізі екеніне сенемін. Осындай игі бастамалардың жалғаса беруін қалаймын», – деді қатысушы.

Байқаудың келесі кезеңдері (аудандық және облыстық) 2026 жылдың сәуір айында өтеді. Қорытындысы бойынша өңірдің үздік кітап оқитын педагогтері анықталады.

Жобаны «AMANAT» партиясының қолдауымен «Кітап оқитын ұлт – Читающая нация» қоғамдық қоры және Қостанай облысы әкімдігі жүзеге асыруда. Өңірлік демеуші – «Олжа Агро» ЖШС агрохолдингі.