Шымкенттегі кітап оқу марафоны: ұстаздары ең көп кітап оқитын мектептер анықталды

Шымкент қаласындағы мектеп мұғалімдері арасында ұйымдастырылған «Кітап оқитын педагог» байқауының бірінші – мектепішілік іріктеу кезеңі аяқталды. 2026 жылғы 18 наурызда тест форматында өткен сынаққа қаладағы 5 980 педагог қатысып, қазақ, орыс және әлем әдебиетінен таңдалған 15 шығарма бойынша білімдерін сынады, – деп хабарлайды Aikyn.kz.

Жоба – Қазақстан Республикасы Президенті Қасым-Жомарт Тоқаевтың «Кітап оқитын ұлт» бастамасы аясында жүзеге асырылуда. Жоба 2025 жылдың қыркүйегінен бастап бірнеше өңірде, оның ішінде Шымкент қаласында пилоттық режимде іске қосылған. Негізгі мақсаты – қоғамның барлық топтарында тұрақты оқу әдетін қалыптастыру, сыни ойлау қабілетін дамыту және кітапты білім мен рухани байлықтың басты көзі ретінде дәріптеу.

«Кітап оқитын педагог» бағыты мектеп ұстаздарына арналған. Қатысушылар екі лигада – қазақ және орыс тілдерінде  сынға түсті. Онлайн-тест форматы барлық педагогке тең мүмкіндік беріп, ашық бәсекеге жол ашты.

Шымкент қаласының барлық бес ауданын қамтыған іріктеу кезеңіне қазақ лигасында 5 169, орыс лигасында 811 ұстаз қатысты. Бұл көрсеткіш жобаның өңірдегі педагог қауымы арасында кеңінен қолдау тапқанын және кітап оқуға деген қызығушылықтың жоғары деңгейде екенін айқын дәлелдейді.

Байқаудың алғашқы кезеңінен өткен үздік педагогтер дипломдар мен сертификаттарға ие болып, аудандық және қалалық кезеңдерге жолдама алды. 

Үздіктер қатарында:

Шымкент қаласы  Жолдасбеков атындағы №9 лицей мектебі; Шымкент қаласы  №83 жалпы орта білім беретін мектебі; Шымкент қаласы Т.Тәжібаев атындағы №81 жалпы орта білім беретін мектебі.

Қатысушылардың басым бөлігі байқаудың тек білім деңгейін тексеріп қана қоймай, кәсіби өсуге, шығармашылық шабыт алуға және әріптестермен тәжірибе алмасуға зор серпін беретінін атап өтті. Осылайша, жоба ұстаздарды ортақ құндылық – кітап оқу мәдениеті төңірегінде топтастырып, жас ұрпақтың рухани дамуына үлес қосуда.

«Бұл байқау маған кітап оқудың тек жеке даму үшін емес, оқушыларға үлгі болу үшін де қаншалықты маңызды екенін тағы бір рет сезіндірді. Жобаға қатысу арқылы өзімнің тарихи білімімді тереңдеттім әрі оқушыларға өткенді түсінудің жаңа жолдарын таптым. Жоба ұстаздарды біріктіріп, ортақ мақсатқа жетелейді – кітап оқитын ұрпақ тәрбиелеу», – дейді Шымкент қаласы  Абай ауданы №138 мектебінің тарих пәні мұғалімі Ержан Алиев.

«Онлайн-тест тапсыру процесі өте ыңғайлы болды, бірақ ең бастысы – шығармаларды оқу барысында алған шабыт. Ағылшын әдебиеті мен қазақ, орыс классикасын салыстыра отырып, әлемдік мәдениеттің байлығын сезіндім. Бұл жоба маған шет тілін оқытуда кітапты тиімді құрал ретінде пайдаланудың жаңа әдістерін ашты», – деді Шымкент қаласы Қаратау ауданы №116 мектептің ағылшын тілі мұғалімі Алима Сегизбаева.

«Байқау маған ұлттық әдебиетті тереңірек түсінуге және оқушыларға оны махаббатпен жеткізуге көмектесті. Кітап оқитын педагог – кітап оқитын ұлттың негізі. Осындай жобалар арқылы біз жас ұрпақтың рухани әлемін байыта аламыз», – дейді қазақ тілі мен әдебиет пәні мұғалімі Гаухар Сейітқұлова.

«Жоба кәсіби өсуге ғана емес, әріптестермен тәжірибе алмасуға да серпін береді. Бұл – ұстаздар үшін шынайы шабыт көзі, өйткені кітап оқу – мәңгілік құндылық», – деді орыс тілі мен әдебиет пәні мұғалімі Екатерина Журавлева.

Келесі кезеңдер 2026 жылдың сәуір айында өтеді, соның қорытындысы бойынша Шымкенттің ең үздік «Кітап оқитын педагогтері» анықталады.

Жобаны «AMANAT» партиясының қолдауымен «Кітап оқитын ұлт – Читающая нация» қоғамдық қоры және Шымкент қаласы әкімдігі жүзеге асыруда. Өңірлік демеуші – «Азия Сервис».