Қостанайда цифрлық ортадағы қазақ тілінің рөлі талқыланды

Қостанайда «ІТ және лингвистка: цифрлық синергия дәуірі» атты форум өтті.

Мемлекеттік тілдің цифрлық кеңістіктегі орыны мен рөлі талқыланған алқыла жиынға халықаралық «Қазақ тілі» қоғамының өкілдері, Мәжіліс депутаттары, сарапшы мамандар қатысты. Форум аясында рухани, мәдени құндылықтарды дамытуға бағытталған меморандумға қол қойылды.

Мемлекет басшысы түрлі салада жасанды интеллект технологияларын дамытуды еліміздің стратегиялық басымдықтарының бірі ретінде айқындап берді. Соның ішінде тіл саясатына, білім беру жүйесіне цифрлық шешімдерді еңгізу ерекше маңызға ие. Қазіргі кезде жасанды интеллектіде қазақ тілінің сапалық деңгейін көтеріп, мазмұнын байыту басты міндетке айналып отыр.

Темір Бектұр, ІТ-сарапшы:

- Біз күнделікті қарапайым сөздермен ғана жасанды интелектімен қарым-қатынасқа түскендіктен, ол бізге жеткілікті секілді көрінеді. Алайда сіз бір тереңдеп кетіңізші, мәселен, нанотехнологияны, биотехнологияны, дәрі жасауды, жаңадан металл жасауды жасанды интеллект арқылы қазақша сұрап көріңіз. Сол кезде контенттің жетіспеушілігін байқаймыз. Мұның барлығы контенттің әлі тапшы екендігін, жасанды интеллектінің әлі де оқытуға мұқтаждық бар екендігін сездіреді.

Алдағы міндет - сапалы тілдік деректер қорын қалыптастыру. Жасанды интеллектің тиімділігі  көлеммен емес, мазмұн сапасымен, терминологиялық дәлдігімен және стилдік байлығымен өлшенеді. Осы тұста тіл және ІТ мамандарының өзара ынтымақтастығы аса маңызды. Қостанай облысында бұл бағытта бірқатар іс-шара қолға алынбақ.

Бақытжан Нарымбетов, облыс әкімінің орынбасары:

- Қостанай облысында алдағы кезеңде тілді оқыту орталықтарының контентін цифрландыру қазақ тіліндегі оқыту және кәсіби мәтіндерді біріңғай базаға жинақтау. ЖИ негізінде тілдік сервистерді еңгізу, мемлекеттік қызметшілерге арналған қазақ тіліндегі цифрлық көмекші құралдарды пайдалану жоспарланып отыр.

Форум аясында облыс әкімдігі мен халықаралық «Қазақ тілі» қоғамы арасында мемлекеттік тілмен, рухани, мәдени құндылықтарды дамыту жөнінде меморандумға қол қойылды. Осы келісімге сәйкес, өңірде батырлар жырын жатқа айтқан балалар арасында байқау ұйымдастыру көзделіп отыр. Жеңімпаз оқушыға сыйлық ретінде миллион теңге, ал оны дайындаған мұғалімге автокөлік беріледі.

Авторлары: Мағауия Қалиев, Сергей Трахтенберг