Қостанайда жаңа мектептің шатыры опырылып түсті: Мердігер бюджетке 266 млн теңге қайтарады

Қостанайда әлі ашылмаған, жаңадан салынып біткен мектептің шатыры құлаған. Сот апаттың жобалау және құрылыс нормаларының бұзылуынан болғанын анықтап, мердігерді бюджетке 266 млн теңгені қайтаруға міндеттеді. Ал құрылыс компаниясы нысандағы мәселелерді жылудың және инженерлік коммуникациялардың болмауымен байланыстырған, деп хабарлайды Egemen.kz.

Фото: Әбіл Дощанов (tobolinfo.kz)

Жоғарғы соттың мәліметінше, 2021 жылы мемлекеттік орган ЖШС-мен 2,2 млрд теңге сомасына білім беру нысанын салу жөнінде келісімшарт жасаған. Құжат бойынша нысан 2023 жылғы 31 желтоқсанға дейін пайдалануға берілуі тиіс еді, алайда белгіленген мерзімде мектеп іске қосылмаған.

«2024 жылдың қаңтар айында мектептің спорт залында шатыр құлады. Оған фермаларға түсетін көлденең жүктеменің рұқсат етілмеген деңгейде артуы себеп болған. Бұл дәнекер тігістің бұзылуына және көтергіш конструкциялардың деформациясына әкелген, осылайша жобалық құжаттама мен құрылыс нормалары бұзылған», делінген сот мәлімдемесінде.

«Тобол Инфо» басылымы жазғандай, мердігер жұмыстарды жылу болмағандықтан тоқтатқан. Ғимарат суық болғандықтан әрлеу жұмыстары мен жабдықтарды монтаждауды жалғастыру мүмкін болмаған.

Түркістан облысында көпір құлады

Басылым репортажында 2024 жылғы 3 қаңтарда спорт залындағы бағаналардың біріне зақым келгені нақтыланады: бетон конструкциясының бір бөлігі үгіліп, қабырғаның фрагменті жұлынып кеткеннен кейін шатырдың бір бөлігі құлаған.
Апат салдарын жою үшін мемлекеттік орган авторлық және техникалық қадағалауға, сондай-ақ құрылысты аяқтауға 266 млн теңгеден астам сомаға бөлек шарттар жасаған. Осы шығындарды тапсырыс беруші мердігерден залал ретінде өндіріп алуды талап еткен.

ЖШС өкілі талаппен келіспей, фермалардың шамадан тыс жүктелуі құбырлардағы судың қатып қалуынан, жылымық кезінде шатырдың суға толуынан болғанын айтып, инженерлік желілердің уақытылы тартылмағаны үшін тапсырыс берушіні кінәлауға тырысқан.

Алайда сот бұл уәждерді қабылдамай, келісімшарт талаптарына сәйкес компания жұмыстардың сапасына, қолданылған материалдарға, сондай-ақ құрылыстың жобалық құжаттама мен техникалық талаптарға сәйкестігіне толық жауапты екенін атап өтті. Сонымен қатар, ЖШС конструкциялардың сенімділігі мен қауіпсіздігіне кепілдік берген және шартты тиісінше орындамаған жағдайда тапсырыс берушінің шығындарын өтеуге міндеттелген.

Сенімнен айырылған мердігерлерге бақылау күшейді

Сот пайдалану және климаттық факторларды мердігер жобалау мен құрылыс кезеңінің өзінде ескеруі тиіс екенін көрсетті. Мұндай мән-жайлар конструктивтік ақаулар үшін жауапкершіліктен босатпайды.

Талап арыз толық көлемде қанағаттандырылып, ЖШС-ға облыстық бюджетке 266 млн теңгеден астам қаражатты – оның ішінде сараптамаларға, апат салдарын жоюға және мектеп құрылысын аяқтауға кеткен шығындарды өтеу міндеттелді.

Жауапсыз мердігерді 135 миллион теңге көлеміндегі айырманы төлеуге міндеттеді

Сот шешімі әзірге заңды күшіне енген жоқ.