Құрылтай Жоғарғы сот судьяларын қызметінен босатты

Жоғарғы соттың бірнеше судьясы өкілеттігін мерзімінен бұрын тоқтатады. Құрылтай депутаттары оларды қызметінен босату үшін дауыс берді, деп хабарлайды Tengrinews.kz тілшісі.

Мемлекет басшысының Жоғарғы соттың бірқатар судьясын қызметінен босату туралы ұсынысын Құрылтайдың жалпы отырысында Жоғары сот кеңесінің төрағасы Дмитрий Малахов мәлімдеді.

"Мемлекет басшысының 2026 жылғы 23 қыркүйектегі жарлығына сәйкес, Жоғарғы сот судьялары Сәкен Абдулла мен Аслан Түкиев Конституциялық соттың судьялары болып тағайындалды. Сонымен қатар Марина Боровик, Нұржан Қайыпжан, Валерий Ноздрин және Мәдина Омарбекова өз еркімен құрметті демалысқа шығуға ниет білдірді", - деді Малахов.

Ол судьялардың әрқайсысы өз жұмысына ондаған жыл ғұмырын арнағанын атап өтті.

"Олар - судьялық жолды адал әрі беріле атқарып, отандық сот төрелігіне қомақты үлес қосқан жоғары деңгейлі мамандар. Барлық судья сот қауымдастығында мінсіз беделге ие және терең құрметке бөленген. Құрметті депутаттар, Мемлекет басшысының ұсынысын қолдауларыңызды сұраймыз", - деп толықтырды Дмитрий Малахов.

Депутаттар судьяларды тиісті қызметтерінен босату туралы шешімді қолдап, дауыс берді.

Еске сала кетейік: қыркүйек айында Құрылтай Мемлекет басшысының ұсынысы бойынша Конституциялық соттың он судьясын тағайындауға келісім берген болатын. Палата отырысында тиісті ұсынысты Президент Әкімшілігінің басшысы Роман Скляр жариялаған еді.

Бізді Google-дың негізгі дереккөздер тізіміне қосыңыз