Қытай әлемдегі ең ірі термоядролық магниттің құрылысын аяқтады

Қытай әлемдегі ең ірі термоядролық магниттің құрылысын аяқтағанын хабарлады. Мамандардың айтуынша, бұл болашақта Күндегі процесті қайталап, таза энергия өндіруге арналған «жасанды Күн» жобасындағы маңызды кезең.

Жоба аясында ұзындығы 21 метр, салмағы 582 тонна болатын әлемдегі ең ірі тороидтық магнит пен тағы бір негізгі асқын өткізгіш магнит әзірленді. Сынақтардан сәтті өткен құрылғылар болашақ тәжірибелік термоядролық реакторда пайдалануға дайын деп танылды.

Қытай ғарыш саласында жаңа жетістікке қол жеткізді

Әзірлеушілердің мәліметінше, магниттер толықтай Қытайдың өз технологиялары негізінде жасалған. Яғни, асқын өткізгіш материалдардан бастап күрделі өндірістік процестерге дейінгі барлық жұмыс жергілікті мамандардың күшімен орындалған.

Бұл магниттер температурасы 100 миллион градус цельсийден асатын плазманы тұрақты ұстап тұруға арналған. Мұндай жағдай термоядролық синтез реакциясын жүргізудің негізгі шарты саналады.

Қытайдың жасыл энергетикаға инвестициясы рекордтық деңгейге жетті

Жоба авторларының айтуынша, магниттердің сәтті жасалуы реакторды әзірлеудегі ең күрделі инженерлік міндеттердің шамамен 80 пайызын орындауға мүмкіндік берген.

Ендігі кезеңде тәжірибелік термоядролық реакторды құрастыру және ұзақ мерзімді сынақтар өткізу жоспарланған. Қытай бұл реактордың құрылысын 2027 жылға дейін аяқтап, ал термоядролық энергия өндірудің алғашқы демонстрациялық сынақтарын 2030 жылға қарай өткізуді көздеп отыр.