BI Industrial Петропавлда Bakerton зауытының құрылысын аяқтады

Петропавлда донаттар мен ұзақ мерзім бойы сақталатын нан-тоқаш өнімдерін шығаратын жаңа Bakerton зауытының құрылысы аяқталды, – деп хабарлайды Aikyn.kz сайты.

Жобаның құрылыс және инженерлік бөлігін BI Group құрамына кіретін BI-Industrial компаниясы жүзеге асырды. Өндірістік ғимараттың жалпы ауданы шамамен 17 мың шаршы метрді құрады.

Жаңа кәсіпорын Qyzyljar арнайы экономикалық аймағының аумағында орналасқан. Зауыттың жобалық қуаты – жылына шамамен 13 мың тонна өнім. Кәсіпорында 380-ге жуық тұрақты жұмыс орнын ашу көзделген.

Құрылыс барысында BI-Industrial командасы негізгі өндірістік корпусты тұрғызды, ішкі және сыртқы инженерлік жүйелерді жүргізіп, қажетті желілерге қосты, ілеспе инфрақұрылымды салып, аумақты абаттандырды. Сондай-ақ компания мамандары ғимараттың инженерлік жүйелерін кешенді іске қосу-баптау жұмыстарын жүргізді.

Құрылыс кезінде шамамен 4,3 мың текше метр бетон жұмыстары орындалып, 1 950 тоннаға жуық металл конструкция монтаждалды. Құрылыс жұмыстарының ең қарқынды кезеңінде алаңда бір мезгілде 218-ге дейін маман еңбек етті.

Зауытта тіпті бұрыштардың өзі маңызды

Жобаның басты ерекшеліктерінің бірі – тамақ өндірісіне арналған үй-жайларға қойылатын жоғары талаптар. Құрылысшылардың алдында жай ғана жылы әрі герметикалық корпус тұрғызу емес, сәулеттік және инженерлік шешімдер қажетті санитариялық режимді сақтауға мүмкіндік беретін бақыланатын өндірістік орта қалыптастыру міндеті тұрды.

Өндірістік үй-жайлардағы сэндвич-панельдер көлденең жіктер мен шаң жиналуы мүмкін беттердің санын азайту үшін тігінен монтаждалды. Қабырғалар мен еден түйісетін жерлерде стандартты бұрыштың орнына бірқалыпты радиусты өтпе жасалды. Мұндай шешім үй-жайларды санитариялық өңдеуді тиімді жүргізуге мүмкіндік береді.

Ішкі контурдың герметикалығына ерекше назар аударылды. Технологиялық процеске қажетті тұрақты температуралық режимді сақтау үшін жіктер, түйісу орындары мен төбе панельдері қосымша герметикаланды. Өндірістік үй-жайларда ашық металл конструкциялар, шығыңқы элементтер және санитариялық өңдеу қиын басқа да аймақтар барынша азайтылды.

– Тамақ өндірісінде құрылыс сапасы болашақ технологиялық процеске тікелей байланысты. Мұнда жекелеген жіктер мен түйісу орындарына дейінгі шешімдердің бәрі маңызды. Сондықтан біздің міндетіміз тек өндірістік корпус салу емес, тапсырыс берушінің технологиялық жабдықтарын орналастыруға және іске қосуға толық дайын инженерлік орта қалыптастыру болды, – деді BI-Industrial жобасының жетекшісі Ғабиден Еңсебаев.

Құрылыс корпусынан дайын инженерлік ортаға дейін

Нысандағы жұмыстар кезең-кезеңімен жүргізілді. Бастапқыда BI-Industrial ғимараттың негізгі контурын салуға жауапты болды. Кейін компанияның жауапкершілік аясы кеңейіп, ішкі және сыртқы инженерлік жүйелерді жүргізу, желілерге қосу, инфрақұрылым салу және аумақты абаттандыру жұмыстары да қамтылды.

Конструкциялар мен инженерлік коммуникацияларды өзара үйлестіру үшін команда 3D-модельдеуді пайдаланды. Бұл құрылыс алаңында тиісті жұмыстар басталғанға дейін техникалық шешімдерді алдын ала пысықтап, әртүрлі жүйелерді өзара сәйкестендіруге мүмкіндік берді.

Өндірістік желілердің технологиялық жабдықтарын тапсырыс беруші сатып алып, оларды мамандандырылған жеткізушілер орнатты. BI-Industrial өз тарапынан өндірістік жабдықтарды интеграциялау және зауытты кейіннен іске қосу үшін кәсіпорынның құрылыс және инженерлік дайындығын қамтамасыз етті.

Bakerton жобасы BI-Industrial компаниясының өнеркәсіптік нысандар портфелін толықтырды. Қазір компания Қазақстанда тамақ өнеркәсібінен бастап мұнай-химия, химия өндірісі мен энергетикаға дейінгі түрлі салалардағы ірі өндірістік жобаларды жүзеге асыруға қатысып келеді.

Дивизионның тапсырыс берушілері мен серіктестері қатарында PepsiCo, Silleno, Qazaq Soda, Masdar және басқа да халықаралық және қазақстандық компаниялар бар. Bakerton жобасы BI-Industrial компаниясының тамақ өнеркәсібі кәсіпорындарын салу саласындағы құзыретін кеңейтті. Бұл салада құрылыс және инженерлік шешімдер болашақ технологиялық процестің ажырамас бөлігі саналады.