​ҚМГ басшысы Атырау облысындағы Силлено зауытының құрылысын тексерді

«ҚазМұнайГаз» ҰК АҚ Басқарма төрағасы Асхат Хасенов Атырау облысына жұмыс сапары барысында жылына 1,25 млн тонна полиэтилен өндіретін «Силлено» зауытының құрылыс алаңына барды.

Бұл жоба Мемлекет басшысының мұнай-газ химиясы кластерін дамыту жөніндегі тапсырмасы аясында жүзеге асырылып жатыр және өңдеу өнеркәсібіндегі ең ірі нысандардың бірі саналады.

Қазіргі уақытта екі негізгі технологиялық қондырғыда жұмыстар жүргізілуде, жобаның орындалу деңгейі – 22%.

Пиролиз қондырғысында қада қағу (89%) және іргетас құю (20%+) жұмыстары жалғасуда, құбыр эстакадаларына арналған темірбетон конструкциялары орнатылып жатыр.

Полимерлеу алаңында 427 мың м³ жер жұмыстары атқарылып, 3 721 қада қағылды.

Биыл салмағы 1,5 мың тоннаға жуық, биіктігі 101 метр этиленді фракциялау бағаналары жеткізіліп, монтаждалады.

Құрылысқа 1 300-ден астам адам (оның 90%-дан астамы – Қазақстан азаматтары) және 330 техника жұмылдырылған. Зауытты іске қосу және алғашқы өнімді шығару 2029 жылға жоспарланған.

Полиэтилен өндірісі Қазақстанның импортқа тәуелділігін азайтып, қосылған құны жоғары өнім шығаруға мүмкіндік береді.

Асхат Хасенов Теңіз кен орнында салынып жатқан Газ сепарациялау кешені мен магистралды этан және пропан құбыржолдары құрылысының барысымен де танысты.

ГСК жобасында қада қағу және аумақты дайындау жұмыстары жүріп жатыр, құрылысқа 600-ден астам адам тартылған, оның 70%-ы – Атырау облысының тұрғындары. Магистралды құбыржолдар бойынша EPC-мердігер 2025 жылдың соңында анықталады, ал құрылыс-монтаждау жұмыстары 2026 жылдың екінші жартысында басталады.

ҚМГ басшысы өңірдегі барлық ірі мұнай-газ химиясы жобаларының құрылыс кестесін қатаң сақтауды тапсырды.

Бүгін, 11:25