Қыс мезгілінде автокөлікке аккумуляторды қалай дұрыс таңдау керектігін сарапшы айтып берді

Қыс түсер алдында көптеген жүргізуші аккумуляторды ауыстыру туралы ойланады. Бірақ оны тек сыйымдылығына қарай немесе "неғұрлым қуатты болса, соғұрлым жақсы" деген ұстаныммен таңдау қате.

Сатып алу кезінде қандай сипаттамаларды ескеру керек, нақты көлікке қандай аккумулятор сәйкес келеді және ескісін ауыстыру уақыты келгенін қалай түсінуге болады? Бұл туралы Tengri Auto сауалына сарапшы Анатолий Русев түсіндіріп берді.

Ең бастысы - аккумуляторды көлікке сәйкестендіріп таңдау

Аккумулятор таңдағанда бірнеше сипаттаманы бірден ескеру қажет: сыйымдылығы, іске қосу тогы, өлшемдері, полярлығы және түрі.

Сарапшы ең алдымен көлік өндірушісінің ұсыныстарына сүйенуге кеңес береді. Тек маркасы, моделі және қозғалтқыш көлемі туралы ақпарат кейде жеткіліксіз болуы мүмкін. Нақты модификациясы, жабдықталуы, Start-Stop жүйесінің болуы және қосымша электр жабдықтары маңызды рөл атқарады.

"Тек қана "қуаттырақ" аккумулятор сала салу - әрдайым дұрыс шешім емес. Ол көліктің өлшемдеріне, сипаттамаларына және түріне сәйкес келуі тиіс", - деп атап өтті Русев.

Сондай-ақ сатып алар алдында аккумулятордың өлшемдерін, оң клемманың орналасуын және бекіту түрін тексеріп алу керек.

Сыйымдылықты қалай дұрыс таңдау керек?

Аккумулятордың сыйымдылығы ампер-сағатпен (А-сағ) өлшенеді. Көлік өндірушісі ұсынған көрсеткішті ұстанған дұрыс.

Егер аккумулятор өлшемі мен сипаттамалары бойынша сәйкес келсе және генератор оны қалыпты зарядтай алса, сыйымдылықты аздап арттыруға болады. Мысалы, өндіруші рұқсат берген параметрлер аясында 5-10 А-сағ-қа арттыру әдетте қиындық тудырмайды.

Сонымен қатар, сыйымдылықты айтарлықтай азайтуға болмайды. Әсіресе қыста аккумулятор тезірек отырып қалуы мүмкін, ал қысқа қашықтыққа жүргенде ол қайта зарядталып үлгермейді.

Қыста іске қосу тогы неге маңызды?

Іске қосу тогы аккумулятордың қозғалтқышты оталдыру үшін қысқа уақыт ішінде қандай ток бере алатынын көрсетеді.

Қыста бұл көрсеткіш өте маңызды. Аязда май қоюланып, стартерге қозғалтқышты айналдыру қиындайды, ал аккумулятордың өзі ток беру қабілетінің бір бөлігін жоғалтады.

Сондықтан, басқа көрсеткіштері бірдей болған жағдайда, іске қосу тогы жоғары аккумуляторды таңдаған абзал. Дегенмен, өндірушінің ұсыныстарын ескермей, ең жоғары көрсеткішті таңдаудың қажеті жоқ.

Дизельді көліктер үшін іске қосу тогы ерекше маңызды, себебі мұндай қозғалтқышты оталдыру үшін әдетте көбірек күш жұмсалады.

Аккумулятордың қай түрін таңдаған жөн?

Қазіргі көліктерде кәдімгі қорғасын-қышқылды аккумуляторлармен қатар EFB және AGM түрлері қолданылады.

EFB және AGM жиі зарядталу мен қуат таусылу циклдеріне және жоғары электрлік жүктемеге төзімді келеді. Олар әсіресе Start-Stop жүйесі бар және электр жабдықтары көп көліктер үшін өте тиімді.

Егер көлік бастан-аяқ AGM-ге арналған болса, оны тек үнемдеу үшін кәдімгі аккумуляторға ауыстырудың қажеті жоқ. Бұл аккумулятордың тез тозуына және Start-Stop жүйесі мен зарядтау жұмысында ақаулардың туындауына әкелуі мүмкін.

Аккумулятордың бір түрінен екіншісіне ауысу мүмкіндігі көліктің нақты моделіне және зарядты басқару жүйесіне байланысты.

Аккумуляторды ауыстыру керек екенін қалай білуге болады?

Алғашқы белгілердің бірі - қозғалтқыштың, әсіресе таңертең немесе ұзақ тұрғаннан кейін, ауыр оталуы.

Сондай-ақ көлік тұрғаннан кейін зарядтың тез төмендеуіне және аккумуляторды жүйелі түрде қайта зарядтау қажеттілігіне назар аудару керек.

Қыс алдында сарапшы аккумуляторды арнайы тестермен немесе жүктеме айырымен тексеруге кеңес береді. Бұл ретте тек кернеуді ғана емес, аккумулятордың нақты жағдайын, сондай-ақ оның іске қосу тогын беру қабілетін бағалау маңызды.

Жаңа аккумулятор сатып алғанда, оның шыққан күнін тексерген жөн. Егер ол тиісті техникалық қызмет көрсетусіз және зарядтаусыз ұзақ сақталса, оның жағдайы жаңа шыққан нұсқаға қарағанда нашар болуы мүмкін.

Аязға дейін тағы нені тексеру керек?

Егер көліктің басқа жүйелерінде ақау болса, тіпті жаңа аккумулятор да қозғалтқыштың оңай оталуына кепілдік бере алмайды.

Қыс алдында генераторды, стартерді және мотор майының күйін тексерген дұрыс. Дизельді көліктер үшін қыздыру шамдарының жарамдылығы мен қозғалтқыштың жалпы жағдайы да маңызды.

"Мен капшаның астына сыятын ең қуатты аккумуляторды емес, дәл сол көлікке оңтайлы аккумуляторды таңдауды ұсынар едім", - деп түйіндеді Русев.

Аккумулятор таңдаудағы басты ереже - аяз алдында жай ғана жаңасын сатып алу емес, оны өндірушінің талаптарына сай таңдау. Ал егер көлік таңертең әрең оталып жүрсе, алғашқы қатты аязды күтпей, аккумуляторды алдын ала тексерткен жөн.

Бұған дейін Анатолий Русев көлікті қысқа қалай дайындау керектігін айтқан болатын.

Тағы оқыңыз: Көлікке арналған әйнек тазалағыштар: айырмашылығы неде және қалай таңдаған дұрыс?

Бізді Google-дың негізгі дереккөздер тізіміне қосыңыз

Қосу