Мадуро мен оның әйеліне америкалықтарды азаптауға байланысты жаңа айыптар тағылады БАҚ

Нью-Йорктегі прокурорлар Венесуэланың бұрынғы президенті Николас Мадуро мен оның әйелі Силия Флореске кейінгі жылдары осы елде қамауда болған америкалықтарды азаптады деген айыппен жаңа айыптар тағады, деп хабарлайды Tengrinews.kz тілшісі CNN-ге сілтеме жасап.

Бұл туралы телеарнаға тергеу барысымен таныс бірнеше адам хабарлады.

Олардың айтуынша, жаңа айыптар туралы мәлімдеме бейсенбіде жариялануы мүмкін. Дереккөздердің түсіндіруінше, бұл жайттар АҚШ билігі заңсыз деп таныған, Мадуроның президенттігі кезінде Венесуэла түрмелерінде отырған 10-нан астам АҚШ азаматын ұстауға қатысты болып отыр.

Жағдаймен таныс дереккөздің мәліметінше, тергеушілер америкалықтарды азаптауға қатысы бар деген күдікпен тағы бірнеше адамға айып тағу мүмкіндігін талқылаған.

Құрама Штаттардың 10-нан астам азаматы Мадуро үкіметі тарапынан ұсталған болатын. АҚШ пен құқық қорғаушылар Венесуэла билігін оларды саяси кепіл ретінде пайдаланды деп айыптады. Босатылған бірнеше америкалық қамауда болған кезде көрген азаптаулары туралы айтып берді.

Мәселен, 2022 жылдың қазан айында тұтқындарды алмастыру аясында босатылған Мэттью Хит пен Осман Хан сот талап арызында өздерін сумен азаптағанын, ток соқтырғанын, сексуалдық зорлық-зомбылықпен қорқытқанын, сананы өзгертетін дәрі-дәрмектер бергенін және жалғыз адамдық камераларда ұстағанын мәлімдеді. АҚШ Теңіз жаяу әскері корпусының ардагері Хит қамауда болған кезінде өз-өзіне қол жұмсамақ болған.

Мадуро мен оның әйелін қаңтар айында Каракастағы президент сарайында америкалық әскерилер қолға түсірді. Бұрынғы президент пен оның жұбайы наркотерроризм жасау мақсатындағы астыртын әрекетке қатысты және өздеріне тағылған басқа да айыптар бойынша кінәсін мойындаған жоқ. Қазіргі уақытта олар Нью-Йоркте кепілмен босату құқығынсыз қамауда отыр.

Флорес бейсенбі күні сот алдына келеді деп күтіледі. Оның адвокаты сот процесі басталғанға дейін үйқамаққа ауыстыру туралы өтініш беруге ниетті.

Мадуроның әйелі денсаулығына байланысты өзін үйқамаққа жіберуді сұрады

Мадуроның адвокаттары оның қамауға алынуының заңдылығына күмән келтіріп, Венесуэланың бұрынғы басшысының иммунитеті болуы тиіс деп мәлімдейді, өйткені айыпталған іс-әрекеттер ол билікте болған кезеңде жасалған. Айыптау тарапының мәліметінше, Венесуэла үкіметі Мадуроға иммунитет беру талабына қосылмай отыр.

Бізді Google-дың негізгі дереккөздер тізіміне қосыңыз