Қайрат Сатыбалдыұлының бұрынғы қонақүйінің тағдыры не болатыны белгілі болды

Бұрын Қайрат Сатыбалдыұлына тиесілі болған Есентай өзенінің жағасындағы құрылысы аяқталмаған қонақүй ғимаратында не ашылатыны белгілі болды. Нысанның алдағы тағдыры туралы қала әкімдігінің өкілдері айтып берді, деп хабарлайды Tengrinews.kz тілшісі.

Almaty AI Hub

Алматы әкімдігінің мәліметінше, мегаполисте технологиялық бизнес, әзірлеушілер, стартаптар мен зерттеушілер үшін жаңа инфрақұрылым қалыптасып келеді. Осыған байланысты қалада екі ірі жоба – Almaty AI Hub және Almaty AI Park жүзеге асырылып жатыр.

Осы жобалардың бірі, атап айтқанда AI Hub жобасын қонақүйдің аяқталмаған ғимаратында ашу жоспарланған.

"Ауданы 9,4 мың шаршы метрден асатын ғимарат 556 жұмыс орнына арналған көпфункционалды алаң ретінде жаңартылады. Мұнда IT және AI компаниялары, стартаптар мен әзірлеушілерге арналған кеңістіктер, білім беру алаңдары, коворкинг, кеңселер, конференция және event-аймақтар орналасады", - деп хабарлады әкімдік өкілдері.

Иллюстрация: Алматы әкімдігі ұсынған

Иллюстрация: Алматы әкімдігі ұсынған

Хаб құрамына жасанды интеллект мектебі мен AI Campus инфрақұрылымы да кіреді. Жеке бағыт робототехникаға арналады: мұнда демонстрациялық аймақтар, сондай-ақ оқу және әзірлеу мүмкіндіктері пайда болады. Технологиялық командалар мен компаниялар кеңселерді және коворкингтерді пайдалана алады, ал іс-шаралар өткізу үшін конференция залдары мен event-кеңістіктер қарастырылған.

Иллюстрация: Алматы әкімдігі ұсынған

Иллюстрация: Алматы әкімдігі ұсынған

3 қыркүйекте "Алматы" ӘКК редакция сауалына берген жауабында құрылыс жұмыстарын аяқтап, нысанды пайдалануға беру 2027 жылдың I–II тоқсанына жоспарланғанын хабарлады.

Екінші жоба – Almaty AI Park 4,9 гектар аумақта салынады деп жоспарланып отыр. Алдын ала мәлімет бойынша, ол Құлжа тасжолындағы "Шығыс қақпасы" ауданында бой көтереді. Кешеннің жалпы ауданы 76 мың шаршы метрге жуықтайды.

Иллюстрация: Алматы әкімдігі ұсынған

Әкімдік деректеріне сәйкес, бұл нысанда R&D және AI зертханалары, технологиялық компаниялардың кеңселері, коворкинг, акселератор мен бизнес-инкубатор, сондай-ақ event және білім беру инфрақұрылымы болады.

Иллюстрация: Алматы әкімдігі ұсынған

Кешен құрамында тікелей технологиялық кластер ішінде мамандар даярлайтын университет те қарастырылған.

"Тағы бір бағыт – жас компанияларды қолдау. Стартаптар үшін бірлесіп жұмыс істеуге, презентациялар мен питч-сессиялар өткізуге арналған кеңістіктер құрылады. R&D зертханалары жаңа технологиялық шешімдерді әзірлеу мен сынақтан өткізу алаңына айналады", - деп түсіндірді әкімдік өкілдері.

Иллюстрация: Алматы әкімдігі ұсынған

Иллюстрация: Алматы әкімдігі ұсынған

Жоба екі кезеңде жүзеге асырылады: біріншісін 2027 жылғы желтоқсанда, екіншісін 2028 жылғы желтоқсанда аяқтау жоспарланған.

Еске сала кетейік, Қайрат Сатыбалдыұлы Алматыдағы Есентай өзені жағасында орналасқан қонақүй ғимаратын мемлекетке сыйға тартқан. 2023 жылғы қыркүйекте қонақүй ғимараты ресми түрде республикалық меншікке өтіп, Алматы бойынша сот әкімшілігі департаментінің теңгеріміне берілді. 2026 жылғы 7 сәуірде қонақүй мен жер учаскесі қаланың коммуналдық меншігіне өтті. Жылжымайтын мүлік "Алматы" ӘКК" АҚ теңгеріміне қабылданды.

Бізді Google-дың негізгі дереккөздер тізіміне қосыңыз