Балықты Атыраудан келе жатқан жолда сатып алған: 9 жасар баланың өлімі туралы не белгілі

Маңғыстау облысында тоғыз жасар баланың ботулизмнен қайтыс болуына байланысты сотқа дейінгі тергеу басталды. Бала мен оның отбасының тағы төрт мүшесі Атырау облысынан келе жатқанда қолдан сатып алынған балық өнімін тұтынғаннан кейін ауырып қалған. Tengrinews.kz тілшісі отбасы тұратын ауылға барып қайтты.

Бала ботулизмнің ауыр түрінен Ақтау ауруханасында көз жұмды. Отбасы балықты нақты қай жерден және кімнен сатып алғанын анықтау қазір мүмкін емес: өнім толығымен таусылған, полиция мәліметінше, сатушыны табылмады.

Отбасына көңіл айтушылар келіп жатыр

Уланудан зардап шеккен отбасы тұратын Басқұдық ауылы Ақтаудан шамамен жарты сағаттық жерде орналасқан. Мұнда ауруханада қайтыс болған тоғыз жасар баланың жақындарына көңіл айту үшін адамдар әлі де келіп жатыр.

Басқұдық ауылы. Фото: Tengrinews.kz

Тексеріс барысында оқиғаның кейбір мән-жайы анықталды. Маңғыстау облыстық санитарлық-эпидемиологиялық бақылау департаментінің мәліметінше, эпидемиологиялық зерттеу кезінде мамандар ауырған адамдардан жауап алған.

Балық Атырау облысынан келе жатқанда тасжол бойындағы белгісіз жерден қолдан сатып алынғаны белгілі болды. Оны үйге әкеліп, тоңазытқышта сақтаған. Кейін отбасылық іс-шара кезінде дастарханға қойылған.

"Балық өнімін 6 адам тұтынған, оның ішінде 5 адам ауырып қалды. Жүргізілген эпидемиологиялық зерттеу нәтижесінде балық өнімінің қалдығы табылмады, соған байланысты зертханалық зерттеу жүргізілген жоқ. Балық Атырау облысы аумағында сатып алынғандықтан, барлық мән-жайды анықтау үшін Атырау облысының санитарлық-эпидемиологиялық бақылау департаменті мен полиция департаментіне тиісті хаттар жолданды. Ол жақтан жол бойында бұл балық өнімін сату деректері анықталмады деген жауап алынды", - деп хабарлады Маңғыстау облыстық санитарлық-эпидемиологиялық бақылау департаменті.

Санэпидемиологтардың мәліметінше, балықты сатқан адам табылмаған, ал өнімді толығымен жеп қойғандықтан, оны зертханада тексеру мүмкін болмай отыр.

21 қыркүйекте не болды?

Маңғыстау облыстық денсаулық сақтау басқармасы 2026 жылғы 21 қыркүйекте бір отбасының төрт мүшесі, оның ішінде кәмелетке толмаған бала медициналық көмекке жүгінгенін хабарлады. Науқастарда ботулизмге тән белгілер болған. Оларға медициналық көмек көрсетіліп, ботулизмге қарсы сарысу егілді.

Облыстық аурухананың фотосы: Tengrinews.kz

Науқастардың жағдайын тұрақтандыру үшін республикалық клиникалардан реаниматологтар, инфекционистер мен неврологтар тартылды. Алайда тоғыз жасар баланың жағдайы өте ауыр болды. Сол күні оны облыстық балалар ауруханасына ауыстырды, ол жерде бала жансақтау бөлімінде жатты.

Балаға ботулизмге қарсы сарысу егіліп, жасанды тыныс алу аппаратына қосылған. Соған қарамастан, науқаста ми ісінуі, көп мүшесінің жеткіліксіздігі дамып, III дәрежелі комаға түскен.

"Көрсетілген барлық медициналық көмекке қарамастан, өкінішке қарай, кәмелетке толмаған баланың өмірін сақтап қалу мүмкін болмады. Қазір үш науқасқа қажетті медициналық көмек көрсетіліп жатыр, олар дәрігерлердің бақылауында", - деп хабарлады Маңғыстау облыстық денсаулық сақтау басқармасының баспасөз қызметі.

Ботулизм және кома: Денсаумин Ақтаудағы 9 жасар баланың өліміне қатысты мән-жайды айтты

Жақындары Астанадан көмек сұраған

Бала жансақтау бөлімінде жатқанда, оның туыстары жергілікті билікке Ақтауға Астанадан мамандар жіберуді сұрап жүгінген. Денсаулық сақтау министрлігінің мәліметінше, емдеу шараларына республикалық деңгейдегі мамандар - реаниматологтар, инфекционистер мен неврологтар тартылған. Кеңес пен консилиумдар өткізілді. Алайда баланы аман алып қалу мүмкін болмады.

Ресми мәліметтер бойынша, үш ересек адам медициналық көмек алып жатыр және дәрігерлердің бақылауында.

Маңғыстау облыстық полиция департаменті Қылмыстық кодекстің 304-бабы - "Санитариялық қағидаларды немесе гигиеналық нормативтерді бұзу" бойынша тергеу басталғанын хабарлады. Полиция балық өнімі қолдан сатып алынғанын растады. Тергеу отбасы балықты нақты қай жерден алғанын және оны кім сатқанын анықтауы керек.

Ботулизм несімен қауіпті?

Денсаулық сақтау министрлігі ботулизмнің ботулотоксиннен туындайтын ауыр және өлімге әкелуі мүмкін ауру екенін еске салды. Ол жүйке жүйесін зақымдап, салдануға, жұтыну мен тыныс алудың бұзылуына әкеп соғады.

Токсиннің негізгі көзі - технологиясы бұзылып дайындалған немесе сақталған өнімдер: кептірілген және ысталған балық, үй жағдайындағы консервілер, ет өнімдері.

Дәрігерлер қазақстандықтарды бұзылу белгілері бар, иісі өзгерген, қақпағы ісінген немесе рұқсат етілмеген сауда орындарынан сатып алынған өнімдерді тұтынбауға шақырады.

Айта кетейік, 2024 жылғы жазда Солтүстік Қазақстан облысының Қызылжар ауданында жантүршігерлік оқиға болды. Ауылдық дүкеннен сатып алынған бекон және тұшпарамен кешкі ас ішкен бес адамнан тұратын отбасы уланған. Екі бала - үш жасар ұл мен алты жасар қыз қайтыс болды.

Жаппай улануға қатысты бастапқы іс тоқтатылды, алайда отбасына көмек көрсеткен медбикеге қатысты жеке тергеу айыптау үкімімен аяқталды. Оған екі жылға бас бостандығынан айыру жазасы тағайындалып, үш жылға медициналық қызметпен айналысуға тыйым салынды. Апелляциялық инстанция үкімді өзгеріссіз қалдырды.

Бізді Google-дың негізгі дереккөздер тізіміне қосыңыз

Қосу