Қызылордада ойын сауық орындарында беймезгіл жүрген 242 жасөспірім ұсталды

Облыстық полиция департаментінің қоғамдық қауіпсіздік басқармасы хабарлағандай, осы үш күнде 320 әкімшілік хаттама рәсімделді. Кәмелетке толмаған 14 адам ішкі істер органдарының есебіне алынып, қадағалаусыз және панасыз қалған 3 жасөспірім кәмелетке толмағандарды бейімдеу орталығына жатқызылды.

— Бала тәрбиесі бойынша міндетін орындамаған 29 ата-анаға хаттама толтырылды. Кәмелетке толмаған адамды жәбірлеудің (буллинг, кибербуллинг) 1 дерегі анықталып, ата-анасына хаттама толтырылды. Кәмелетке толмағандардың түнгi уақытта ойын-сауық мекемелерiнде болуына жол берген 15 орынның иелері мен әкімшілік меңгерушілеріне хаттама рәсімделді. 6 жағдай бұзақылық жасау, 10 жағдай түнгі тыныштықты бұзу, 242 жағдай ойын-сауық орындарында және үйінен тыс жерде беймезгіл жүруге байланысты, — делінген хабарламада.

Одан бөлек 19 ата-ана кәмелетке толмағандарды тәрбиелеу, оқыту және (немесе) бағып-күту жөніндегі міндетін орындамайтын, олардың мінез-құлқына теріс әсер ететін кәмелетке толмағандардың ата-аналары мен заңды өкілдерінің профилактикалық есебіне алынды.
Бұған дейін Қызылорда облысында жолаушылар тасымалы саласындағы тәртіпті күшейту мақсатында 5 күнге созылған «Тасымалдаушы» жедел профилактикалық іс-шарасы қорытындыланды.