Рано Нигметованың ісі кассациялық сотта қаралады

Отырыс 3 наурызда Астанада өтеді.

Бұл туралы сотталған Рано Нигметованың адвокаттары Рустам Ахмедияров пен Нұржан Сәрсембаев хабарлады. Олардың айтуынша, қорғау тарапы бұрынғы үкімді негізсіз деп санайды және кінәні дәлелдейтін жеткілікті айғақтар болмағанын алға тартады.

— Сот актілері Астанадағы кассациялық сотта қаралады. Бұл іс бойынша біздің ұстанымымыз — айыпталушының кінәсін дәлелдейтін айғақтар жоқ. Біз оны жеткілікті негізсіз сотталған деп санаймыз, — деді адвокаттар.

Рано аса ірі көлемдегі алаяқтық үшін 6 жыл 6 айға бас бостандығынан айырылған. Тергеу нұсқасына сәйкес, 2024 жылдың наурыз–сәуір айларында Нигметова құрбысымен бірге танысын табысты инвестицияға саласың деген желеумен мобильді қосымша арқылы 33 млн теңгеден астам қаржы аударуға көндірген. Уәде етілген пайда төленбеген. Сонымен қатар, сот материалдарына сәйкес, әйелдер миллиондаған теңгеге гүлге ірі тапсырыстар беріп, оларды төлемеген. Кейін бұл гүлдерді Instagram-да сыйлық ретінде көрсетіп, аудиторияның сенімін арттыру және контент жасау үшін пайдаланған деген айып тағылған.

Қорғау тарапының айтуынша, апелляциялық инстанция шағымды қарау барысында қорғау тарапының уәждеріне және бірінші сатыдағы сот тұжырымдарына тиісті құқықтық баға бермеген.

Кассациялық қарау аясында сот бұрынғы шешімдердің заңдылығы мен негізділігін тексереді. Отырыс қорытындысы бойынша сот актілері өзгеріссіз қалуы немесе қайта қаралуы мүмкін.

Айгүл МАНСУРОВА

Бүгін, 11:11