​​Ресей арқылы өткізу: Лондон Қазақстан мұнайына арнайы жеңілдік енгізді

Ұлыбритания санкциялық режимнен ресми ерекшелік енгізіп, қазақстандық мұнаймен операциялар жүргізуге рұқсат берді. Бұл рұқсат тіпті процесске ресейлік «Транснефть» компаниясы тартылған жағдайда да қолданылады. Тиісті лицензияны Қаржылық санкцияларды іске асыру басқармасы (OFSI) жариялады, деп жазады Petrocouncil.kz.

Құжатқа сәйкес, британдық компаниялар мен олардың контрагенттеріне Ресей Федерациясының аумағы арқылы транзитпен өтетін шикізатты жеткізуге, тасымалдауға және барлық қажетті есеп айырысуларды жүргізуге енді ресми түрде рұқсат етілді.

Операциялар санкцияға ілікпеуі үшін мынадай қатаң талаптар сақталуы тиіс:

Мұнай тек қана Қазақстанда өндірілген болуы керек;

Мәмілелер санкция тізіміндегі ресейлік тұлғалармен байланысты болмауы тиіс («Транснефть» компаниясының транзитке техникалық қатысуын қоспағанда).

Бас лицензия 2026 жылғы 19 наурызда күшіне енді және екі жыл бойы — 2028 жылғы 18 наурызға дейін жарамды болады. Сонымен қатар, британдық билік құжатты кез келген уақытта қайта қарау немесе күшін жою құқығын өзіне қалдырады.

Қазақстан өз мұнайының едәуір бөлігін ресейлік инфрақұрылым (атап айтқанда, «Дружба» мұнай құбыры және КҚК/КТК) арқылы экспорттайды. Бұған дейін ресейлік көлік компанияларына жасалған санкциялық қысым халықаралық сатып алушылар мен банктер үшін қазақстандық шикізатқа есеп айырысу кезінде құқықтық тәуекелдер тудырып келген болатын. Лондонның жаңа лицензиясы алдағы екі жылға осы кедергілерді жояды.

Еске сала кетейік, бұған дейін Қазақстан Энергетика министрлігі мұнай жеткізу бағыттарын әртараптандыру, соның ішінде Транскаспий бағытын дамыту жоспарлары туралы хабарлаған болатын, алайда солтүстік бағыт отандық экспорт үшін әлі де негізгі бағыт болып қала береді.

Бүгін, 09:25