Ресей президенті Russia Today қызметкерлерін телеарна мерейтойымен құттықтады

АСТАНА, 17 қазан — Sputnik. Ресей президенті Владимир Путин Russia Today қызметкерлерін телеарнаның 20 жылдығымен құттықтады, деп хабарлайды Кремль.

Путин Russia Today жүргізушісі Салам Мосафирмен сұхбат кезінде телеарнаға жылы лебізін білдірді.

"Russia Today телеарнасын құру идеясы пайда болған кезде мен оның мұндай ауқымға, осындай сапаға ие болады деп ойламадым. Мен сіздерді осындай жетістіктеріңізбен құттықтаймын. Неліктен менде күмән болды? Себебі, әлемдік бұқаралық ақпарат құралдарының қалыптасқан жүйесіне ену оңай емес. Алайды, мен күтпеген жағдай болып, Russia Today өз орнын тапты", - деді Путин.

Ресей президенті қазір телеарна тарататын ақпарат пен жасап жатқан жұмысқа жер бетіндегі миллиондаған адам сеніммен қарайтынын айтты.

"Russia Today журналистері тыйымдарға, санкцияларға, әкімшілік және қаржылық сипатта қысым жасалғанына қарамастан, өз ойындағысын айтады. Бұл көбінесе әлемдік ақпараттық ағымға сәйкес келмейді. Бірақ сіздер берген ақпараттың шынайылығы, дұрыстығы және кәсібиліктің нәтижесінде аудитория тез өсіп келеді", - деді Путин жүргізушіге.

Сондай-ақ RT ұжымын 20 жылдық мерейтойымен Ресейдің сыртқы істер министрі Сергей Лавров құттықтады. Осы жылдар ішінде телеарна өз дәстүрлерін қалыптастырып, жоғары кәсіби журналистиканың үлгісін көрсетуде, деп атап өтті Лавров.

"RT тілшілері әрқашан әлемдік оқиғалардың бел ортасында, өмірге қауіп төндіретін аймақтарында жұмыс істейді. Олар дайындаған репортаждардың арқасында арнаның миллиондаған аудиториясы біздің елде және одан тыс жерлерде болып жатқан оқиғалар туралы сенімді ақпарат алады", - деп жазды Лавров.

Ресейлік министр шындықты басып тастағысы келетін деструктивті әрекеттердің қыспағына қарамастан өз қызметін лайықты атқарып жатқанын айтты.