Рудный тұрғыны телефон жөндеу арқылы клиенттердің банк шотындағы ақшасын ұрлаған

«Ұялы телефон» жедел-профилактикалық іс-шара барысында Рудный қаласының полиция қызметкерлері бұрын қолданылған ұялы телефондарды жөндеу және сатып алуымен айналысқан жергілікті тұрғынды ұстады, – деп хабарлайды Aikyn.kz сайты.

Тергеу мәліметтері бойынша, ер адам құрылғыларды диагностика және техникалық қызмет көрсету үшін алып, кейіннен банктік қосымшаларға заңсыз кіріп, ақшаны өз шоттарына аударып отырған. Ол құпия сөзді енгізу үшін қарапайым комбинацияларды — туған күндер, иесінің есімдері және басқа да оңай табылатын нұсқаларды пайдаланған.

Қазіргі уақытта оның үш қылмыс эпизодына қатысы дәлелденді. Залалдың жалпы сомасы 1 миллион теңгеден асты. Алдын ала тергеу жүргізілуде, қосымша фактілер мен зардап шеккендер анықталуда.

Полиция азаматтарға киберқауіпсіздік шараларын сақтауын ескертеді:

Телефонды жөндеушіге тікелей ашық күйінде бермеңіз.

Құрылғыны тапсырмас бұрын банктік қосымшаларды өшіріп, барлық есептік жазбалардан шығыңыз.

Жеке деректерді қамтымайтын күрделі құпиясөздерді қолданыңыз.

Құрылғыға бақылау жоғалған жағдайда банктік карталарды және онлайн-қызметке қол жеткізуді дереу блоктаңыз.

Құқық қорғау органдары еске салады: жеке деректерді қорғау және сақтық шаралары ақшаңыздың қауіпсіздігін қамтамасыз етеді.