Сәтбаев университеті Астана қаласында жаңа инженерлік кампус ашты

Жаңа кампус академиялық дайындықты, ғылыми-зерттеулер мен индустрияны біріктіретін инженерлік білімнің, ғылым мен инновациялардың орталығына айналмақ.  

90 жылдықтан астам тарихы бар Сәтбаев университеті сол уақыт аралығында 160 мыңнан астам инженерлерді даярлап шығарды. Олар Қазақстанның индустриялануына, энергетика, геология және машина жасау салаларының дамуына зор үлес қосып келеді. Қазақстанның тұңғыш Ұлттық техникалық зерттеу университетінің Астанада ашылған инженерлік кампусы еліміздің солтүстік аймақтарында өнеркәсіптік секторлардың қарқынды түрде дамуына қажетті инженерлердің жаңа буынын даярлауға бағытталған.

Сәтбаев университетінің жаңа инженерлік кампусы өнімді ғылыми-білім беру ортасын қалыптастыру мақсатында заманауи аддитивті технологиялардың, робототехника, энергетика және машина жасау ісінің зертханаларымен, коуоркингтермен және ыңғайлы зерттеу кеңістіктерімен жабдықталған. Оқу процесі Сәтбаев университетінің академиялық стандарттарына сәйкес, индустриялық серіктестер мен жұмыс берушілердің қажеттіліктерін ескере отырып құрастырылған.

Қазақстан Президенті Қасым-Жомарт Тоқаев атап өткендей, білім экономикасына көшу жағдайында біздің елімізге бәсекеге қабілетті, кәсіби деңгейі жоғары инженерлер өте қажет.

«Біздің мамандарымыз жаһандық бәсекелестікке төтеп бере алатындай білімді әрі білікті болулары тиіс», – деген болатын Мемлекет басшысы.

Сәтбаев университеті инженерлер даярлау жөніндегі білім бағдарламаларын үнемі жаңартып, студенттерді тек жоғары технологияларды қолдануға ғана емес, сонымен қатар оларды жасауға да үйретуді көздейді.

Ғылым және жоғары білім вице-министрі Гүлзат Көбенова кампустың ашылу салтанатында сөйлеген сөзінде былай деп атап өтті: «Астанада Сәтбаев университетінің жаңа кампусының ашылуы – жоғары білім беру жүйесі кеңеюінің, оның уақыт талабына жауап беруге және Қазақстанның орталық өңірі экономикасына қажетті кадрларды даярлауға ұмтылуының тағы бір нышаны болып отыр». 

Сәтбаев университетінің білім беру кеңістігін кеңейту елімізде қарқынды дамып келе жатқан өнеркәсіптік орталықтары мен университеттің өзара байланысын нығайтуға мүмкіндік береді.

«Біздің мақсатымыз – білім мен ғылымды және индустрияны біріктіріп, инженер болуға ұмтылған әрбір адам үшін техникалық білімді қолжетімді ету», – деп атап өтті Сәтбаев университетінің ректоры Мейрам Бегентаев.

Қазақстан инженерлік мектебінің дәстүрлері академик Қаныш Сәтбаевтың есімімен тығыз байланысты. Оның бастамасымен және тікелей қолдауымен құрылған Қазақ политехникалық институты, қазіргі Сәтбаев университеті, еліміздің өнеркәсіптік аймақтарында көптеген техникалық жоғары оқу орындарының ашылуына негіз болды.