Семей мен Қайрат Чемпиондар лигасынан шығып қалды

Футзалдан Чемпиондар лигасының ширек финалында Қазақстанның екі клубы да турнирмен қоштасты. «Семей» мен «Қайрат» жауапты кездесулерде жеңіліп, жарысты жалғастыра алмады, – деп хабарлайды Aikyn.kz

«Семей» өз алаңында Францияның «Этуаль» клубына 2:3 есебімен есе жіберді. Матчтың басында қазақстандық команда екі гол соғып, алға шыққан. Алдымен 1-минут 41-секундта Марсело есеп ашса, 26-минутта Камиль Герейханов есепті 2:0-ге жеткізді. Алайда кездесудің соңғы минуттарында француз клубы камбэк жасап, үш гол соқты. Уассини Гирьо есепті қысқартса, Биляль Баккали екі рет мергендік танытып, матч тағдырын шешті. Алғашқы ойын 4:5 есебімен аяқталғандықтан, екі матчтың қорытындысы бойынша «Семей» 6:8 есебімен жеңіліп қалды.

Алматылық «Қайрат» та ширек финалдан аса алмады. Испанияда өткен ойында қазақстандық клуб «Картахенаға» 4:7 есебімен жол берді. Испаниялық команда алғашқы таймда үш гол соғып, айқын басымдыққа ие болды. «Қайрат» сапынан Дәурен Тұрсагұлов (екі гол), Мухаммад Осаманмуса және Угу Невеш мергендік танытты. Дегенмен алғашқы матчта «Картахена» 2:1 есебімен жеңген болатын. Осылайша екі кездесудің жалпы есебі 9:5 болып, алматылық клуб та турнирден шығып қалды.