Шоттар бұғатталып, полиция араласады : ІІМ қазақстандықтарға ескерту жасады

Мұның қалай жүзеге асатынын ведомство 2026 жылғы 3 маусымда түсіндіріп берді.

"Әдетте бәрі мессенджерде, онлайн ойында немесе әлеуметтік желіде бір хабарламадан басталады. Бейтаныс адам "жеңіл табыс" ұсынып, картаға түскен ақшаны басқаға жіберуді немесе қолма-қол ақшаға айналдыруды сұрайды. Шын мәнінде бұл ұрланған қаражатты жымқыру схемасы болып саналады",- деп мәлімдеді ІІМ.

Атап өтілгендей, алаяқтар ізін жасыру үшін "дроптарды" пайдаланады: ақша бөгде шоттар арқылы өтіп, ал ұйымдастырушылар жасырын қалады.

"Мұндай операцияларға тіпті байқамай қатысу да ауыр салдарға әкелуі мүмкін".ҚР ІІМ баспасөз қызметі

Сондықтан ІІМ ескертеді:

банк картасының деректерін және банк қосымшалары туралы мәліметті бөгде адамдарға бермеңіз; ақшаны аудару арқылы "жеңіл табыс табу" туралы ұсыныстарға келіспеңіз; күдік туындаса, міндетті түрде ата-анаңызға немесе өзіңіз сенетін ересек адамға хабарлаңыз.

Бұған дейін Алматы әуежайында ұсталған бойжеткеннің 16 жылға сотталғанын жазғанбыз.