ШҚО да сотталған Жақсылық Омардың орнына жаңа маман табылды

Шығыс Қазақстан облысы әкімінің бірінші орынбасары болып Дархан Сапанов тағайындалды, - деп хабарлайды Tengrinews.kz ШҚО әкімінің баспасөз қызметіне сілтеме жасап.

Сапанов биыл көктемде алаяқтық және пара алу ісі бойынша сотталған Жақсылық Омарды алмастырды. Биыл ақпанда Омардың ұсталғаны туралы ақпарат пайда болғаннан кейін және сот процесі аяқталғанға дейін облыс әкімінің бірінші орынбасары міндеттері өңір басшысының қазіргі орынбасарлары арасында уақытша бөлінген болатын.

Анықтама: Еске сала кетейік, ШҚО әкімінің бұрынғы бірінші орынбасары Жақсылық Омарға қатысты үкім күшіне енгеннен кейін өңір басшысы Нұрымбет Сақтағанов отставкаға өтініш берген болатын. Алайда оның іске қатысы жоқ болғандықтан, өтініші қанағаттандырылмады. Бұған дейін Мемлекеттік қызмет істері агенттігі облыс, республикалық маңызы бар қала немесе елорда әкімі оның орынбасары, аппарат басшысы немесе аудан, облыстық маңызы бар қала, қаладағы аудан әкімі жемқорлық жасаған жағдайда отставкаға кететінін түсіндірген болатын.

Айта кетейік, Жақсылық Омар ШҚО әкімінің бірінші орынбасары қызметіне 2025 жылғы 7 сәуірде тағайындалған еді. 2026 жылғы 13 ақпанда оның ұсталғаны туралы ақпарат тарады.

Жақсылық Омар. Фото: gov.kz

Бүгін, 22 шілдеде, Шығыс Қазақстан облысы әкімінің өкімімен өңір әкімінің бірінші орынбасары болып 41 жастағы Дархан Сапанов тағайындалды.

Дархан Сапанов (сол жақта), Нұрымбет Сақтағанов - ШҚО әкімі (оң жақта). Облыс әкімі баспасөз қызметі

"Дархан Сапановтың облыс әкімінің бірінші орынбасары лауазымына тағайындалуы оның мемлекеттік басқару, өнеркәсіпті дамыту және әлеуметтік-экономикалық саясатты іске асырумен байланысты кәсіби мансабының кезекті кезеңі болды", - деді ШҚО әкімінің баспасөз қызметі.

Анықтама: Дархан Сапанов 1985 жылы 2 қаңтарда Шығыс Қазақстан облысы Тарбағатай ауданы Ақжар ауылында дүниеге келген. Бірнеше жоғары оқу орнында білім алған. 2007 жылы Д. Серікбаев атындағы Шығыс Қазақстан мемлекеттік техникалық университетін "өнеркәсіптік жылу энергетикасы" мамандығы бойынша бітіріп, инженер біліктілігін алды. 2009 жылы С. Аманжолов атындағы Шығыс Қазақстан мемлекеттік университетін "менеджмент" мамандығы бойынша тәмамдаған. 2022 жылы Ресей Федерациясы Президентінің жанындағы Ресей халық шаруашылығы және мемлекеттік қызмет академиясын Doctor of Business Administration (DBA) бағдарламасы бойынша аяқтады.

Дархан Сапанов еңбек жолын 2007 жылы бастаған. Мемлекеттік сәулет-құрылыс бақылауы, энергетика салаларында, сондай-ақ Энергетика және минералды ресурстар министрлігінде жұмыс істеген.

2009 жылдан 2020 жылға дейін Қазақстан премьер-министрінің кеңсесінде түрлі лауазымдарды атқарып, бас сарапшыдан Индустриялық-инновациялық даму бөлімі меңгерушісінің орынбасарына дейінгі жолдан өткен.

2020–2023 жылдары Президент Әкімшілігінің мемлекеттік инспекторы болып жұмыс істеді. 2023 жылғы ақпаннан бастап Шығыс Қазақстан облысы әкімінің орынбасары лауазымын атқарған. "Ерен еңбегі үшін" мемлекеттік медалімен марапатталған.

Google News арқылы жаңалықтарымызды қадағалаңыз