Щучинсктегі трагедия қаза болғандар саны 12 ге жетті

Щучинскідегі қасіреттен бері бір жарым айдан аса уақыт өтті. "Палау орталығы" дәмханасында болған жарылыс пен өрттен зардап шеккен тағы бір адамның қайтыс болғаны белгілі болды, - деп хабарлайды Tengrinews.kz тілшісі.

Щучинскідегі қасіреттен бері бір жарым айдан аса уақыт өтті. "Палау орталығы" дәмханасында болған жарылыс пен өрттен зардап шеккен тағы бір адамның қайтыс болғаны белгілі болды, - деп хабарлайды Tengrinews.kz тілшісі.

Астанадағы ауруханалардың бірінде емделушінің көз жұмғаны туралы Денсаулық сақтау министрлігінің баспасөз қызметі мәлімдеді. Бұған дейін ол ауруханаға санитарлық авиациямен жеткізілген еді.

Ведомствоның айтуынша, ер адам есін жимастан жансақтау бөлімінде көз жұмды. Ол өрт кезінде тыныс алу жолдарының ауыр жарақатын алып, жансақтау бөлімінде жатқан еді. Оны құтқару мүмкін болмады.

Еске салайық, төтенше жағдай 26 ақпанда кешкі уақытта болған. Щучинск қаласында бес қабатты тұрғын үйге тіркелген бір қабатты дәмханада газ ауа қоспасы жарылып, өрт шыққан. Бұған дейін оқиға салдарынан 7 адам қаза тапқаны, оның бірі 16 жастағы қыз екені хабарланды. Кейін қаза тапқандар саны он бірге жетті.

"Центр плова" дәмханасы жарылған сәт видеоға түсіп қалған.

Оқиға дерегі бойынша Қылмыстық кодекстің 292-бабы 3-бөлігі "Абайсызда екі немесе одан да көп адамның өліміне әкеп соққан өрт қауіпсіздігі талаптарын бұзу" бойынша қылмыстық іс қозғалды. Баптың санкциясы 5 жылдан 10 жылға дейінгі мерзімге бас бостандығынан айыруды қарастырады.

Ақмола облыстық прокуратурасының мәліметінше, қазір соталды тергеу жалғасып жатыр: барлық жағдайды, соның ішінде жарылыс алдындағы жайттарды анықтау бойынша тергеу амалдарының кешені жүргізіліп жатыр.

Бұған дейін "Loft палау орталығы" дәмханасын жалға алушы өрт қауіпсіздігі талаптарының сақталуына жауапты тұлға ретінде күдікті деп танылғаны хабарланған болатын.

"Тергеу нәтижелері бойынша басқа тұлғалардың іс-әрекетіне құқықтық баға берілетін болады", — деп хабарлады прокуратура.

5 наурызда Щучинскідегі дәмхана иесінің екі айға қамалғаны белгілі болды.

Щучинскідегі қайғылы оқиғадан кейін қазақстандықтар пікірлерде басты сауалды қойды: мекемедегі өрт қауіпсіздігі мен газ жабдықтарының жұмысын кім бақылауы керек еді?

Редакция тілшілері бұл сұрақты Ақмола облысының прокуратурасына жолдады:

"Нысан Бурабай ауданының төтенше жағдайлар бөлімі бақылайтын нысандар тізіміне енгізілген және тәуекел деңгейі төмен санатқа жатқызылған. Тиісінше, Кәсіпкерлік кодекске сәйкес жоспардан тыс тексерулерді қоспағанда, мұндай нысандар барып тексерілетін профилактикалық бақылауға жатпайды".

Бұл ретте мекеменің бес қабатты көппәтерлі тұрғын үйдің жанындағы бір қабатты ғимаратта орналасқаны бөлек атап өтіледі.

"2023 жылы нысан "Сәулет, қала құрылысы және құрылыс қызметі туралы" заңға сәйкес дәмхана ретінде қайта жабдықталып, меншік иесі тарапынан дербес пайдалануға берілген", — деп түсіндірді прокуратура өкілдері.