Шымкентте нысана көздеуден халықаралық турнир өтіп жатыр

Қоржынымызда жеті медаль. Оның екеуі – алтын. Шымкент қаласында нысана көздеуден Владимир Почиваловты еске алуға арналған халықаралық туринир өтіп жатыр. Дәстүрлі дода осымен 34-ші жыл қатарыннан ұйымдастырылды. Бұл жарыс спорттық ату түрлері бойынша халықаралық федерацияның күнтізбелік жоспарына енгізілген. Сәйкесінше, қатысушылар әлемдік рейтингтегі жағдайын жақсарта алады.

Биылғы бәсекеге Ресей, Өзбекстан, Тәжікстан, Моңғолия, және Қазақстаннан 130 сұрмерген жиналды. Олар жабық кешенде винтовкамен және тапаншамен нысана көздеу бойынша сынға түседі. Алғашқы жарыс күндерінің қорытындысы бойынша ұлттық құрама сапындағы Никита Шахторин мен Асадбек Назірқұлов ең үздік нәтиже тіркеп, жарыс жеңімпазы атанды. Бұған қоса, қазақ қыз-жігіттері 3 күміс және 2 қола жеңіп алды. Шымкент қаласындағы халықаралық турнир 21 қазанға дейін жалғасады.