Шымкентте жас жігіттің миындағы үш күрделі патологияға ота сәтті жасалды

АСТАНА, 2 маусым – Sputnik. Шымкент нейрохирургтары медицинада сирек кездесетін аса күрделі жағдай бойынша жоғары технологиялық операцияны сәтті өткізді, деп хабарлады әкімдік.

Дәрігерлер 24 жастағы пациенттің миындағы бірден үш ауыр патологияны бір операция барысында алып тастап, оның өміріне төнген қауіпті сейілтті. Медициналық көмек МӘМС есебінен көрсетілген.

"Науқас 6 жасынан бері эпилепсия дертімен ауырып келген. 2014 жылдан бастап ұзақ уақыт ремиссия кезеңі байқалғанымен, жақында қайтадан құрысу ұстамалары пайда болған. Осыған байланысты пациентке тереңдетілген тексеру жүргізіліп, магниттік-резонанстық томография (МРТ) нәтижесінде миының оң жақ маңдай бөлігінде бірнеше сирек патология анықталған", - деп жазылған хабарламада.

Атап айтқанда, пациенттен интрацеребралды липома, артериовеноздық мальформация және фокальды кортикальды дисплазия табылған. Мамандардың айтуынша, интрацеребралды липома – ми ісіктерінің шамамен 1 пайызын ғана құрайтын өте сирек патология.

Дәрігерлер мұндай бірнеше күрделі диагноздың бір науқаста қатар кездесуі нейрохирургия тәжірибесінде өте сирек жағдай екенін атап өтті. Әсіресе, пациенттің жас болуы жағдайдың маңызын арттыра түскен.

Шамамен 7 сағатқа созылған күрделі операцияны нейрохирург-дәрігер Еркін Медетов жасаған. Ота барысында барлық патология бір мезетте толық алынып тасталды.

Қазіргі таңда пациенттің жағдайы тұрақты. Ол дәрігерлердің тұрақты бақылауында ем қабылдап жатыр.

Мамандардың пікірінше, бұл жағдай отандық нейрохирургия саласындағы жоғары кәсіби деңгей мен күрделі операцияларды сәтті орындау мүмкіндігін көрсететін маңызды медициналық жетістік болып саналады.