Сталкинг үшін жаза күшейтілуі мүмкін: 5 жылға дейін бас бостандығынан айыру ұсынылды

Ішкі істер министрлігі сталкинг, яғни адамды қудалау әрекеті үшін жауапкершілікті күшейтуді ұсынып отыр.
Бұл туралы Ішкі істер министрінің орынбасары Санжар Әділов мәлімдеді. Қазіргі заңнамаға сәйкес, сталкинг жасағандарға 200 АЕК-ке дейін айыппұл салу, түзеу жұмыстары, 200 сағатқа дейін қоғамдық жұмысқа тарту немесе 50 тәулікке дейін әкімшілік қамау жазасы қарастырылған.

Алайда ІІМ қолданыстағы шаралар кейбір жағдайларда жеткіліксіз екенін атап өтті. Вице-министрдің айтуынша, Алматы облысында сотталған азамат сот шешімі мен қамауға қарамастан жәбірленушіні қудалауын тоқтатпаған. Осы жағдайдан кейін ведомство заңнаманы қатаңдату қажеттігін көтеріп отыр.

Ұсынылып отырған өзгерістерге сәйкес, сталкинг үшін бұрын жауапқа тартылған адамның жәбірленушіні қайта қудалауы ауырлататын мән-жай ретінде қаралады. Мұндай жағдайда құқық бұзушылық орташа ауыр қылмыстар санатына жатқызылып, кінәлі тұлғаға бес жылға дейін бас бостандығынан айыру жазасы тағайындалуы мүмкін.

ІІМ өкілдерінің мәліметінше, аталған бастама қазір Мәжілістегі жұмыс тобының қарауында жатыр. Егер ұсыныс қолдау тапса, қайталанған сталкинг әрекеттері үшін жаза едәуір қатаңдайды.