Стамбұлдың экс мэрі Экрем Имамоғлуға 2430 жыл түрме жазасы қаупі бар

Стамбұлда бұрынғы қала әкімі Экрем Имамоғлуға қатысты жаңа сот процесі басталды. Айыптау актісі 142 тармақтан тұрады, оның ішінде қылмыстық қауымдастық құру, парақорлық және қаржы жымқыру бар, деп хабарлайды Коммерсантъ. 

Құжат көлемі 3,9 мың бетке жетеді. Hurriyet Daily News хабарлауынша, егер айыптаушы тарап барлық айыпты дәлелдесе, Имамоғлуға 2430 жылға дейін бас бостандығынан айыру жазасы тағайындалуы мүмкін.

Алғашқы отырыс кезінде судья Имамоғлуға сөз сөйлеуге рұқсат бермей, залдан шығып кеткен. Кейін процесс қайта жалғасты. Залда экс-әкімнің туыстары және оппозициялық Республикашыл халық партиясының (РХП) жетекшісі Өзгүр Өзел болды. Сот ғимараты маңында қатаң қауіпсіздік шаралары енгізіліп, 1 км радиуста кез келген наразылық акциясына тыйым салынды. Соған қарамастан, ғимарат сыртында Имамоғлуның көптеген жақтастары жиналды.

Имамоғлу РХП-ның жетекші тұлғаларының бірі саналады және Түркияның еуропалық бағыттағы дамуын қолдайды. Ол 2025 жылдың наурызында коррупция айыбымен қамауға алынған. Өзі барлық айыпты саяси астары бар деп жоққа шығарады.

Имамоғлу президенттік сайлауда Реджеп Тайып Ердоғанның басты қарсыласы ретінде қарастырылған еді. Оның қамауға алынуы Түркия қалаларында миллиондаған адам қатысқан наразылықтарға себеп болды.

2025 жылдың шілдесінде ол прокурорды қорлау және қоқан-лоқы көрсету ісі бойынша бір жыл сегіз айға бас бостандығынан айырылған. Қазіргі қаралып жатқан іс аясында Имамоғлумен бірге шамамен 400 адам сотқа тартылған. Олардың қатарында Стамбұл, Анталья, Бурса және басқа қалалардың әкімдік қызметкерлері, кәсіпкерлер мен журналистер бар.

Бүгін, 14:53