Студенттер дрон жинап үйренеді

Енді студенттер де дрон жинап үйренетін болады. Бүгін Еуразия ұлттық университеті, ұшқышсыз ұшу аппараттарын шығаратын ғылыми орталықтың базасында өз кафедрасының филиалын ашты. Бұл жерде ғарыштық техника және технологиялар кафедрасының студенттері өз білімдерін жетілдірмек. 

Айта кету керек, ғылыми орталықта қазір әскери және азаматтық бағыттағы дрондар шығарылады. Оның денін еліміздің қарулы күштері мен төтенше жағдайлар министрлігі өз жұмыстарында кеңінен қолдануда. Мамандардың сөзінше, кафедраның жаңа филиалы жастардың практикалық дағдыларын арттырып қана қоймай, отандық дрон өндірісін дамытуға да серпін береді.

Болашақ инженерлер тікелей өндіріс алаңында жұмыс істеп, құрылғыларды құрастыру, бағдарламалау және сынақтан өткізу кезеңдеріне де еркін қатыса алады.

Ерік Нұрмолдин, Л.Н.Гумилев атындағы еұу физика-техникалық ғылымдары институтының директоры:
- Оқу бағдарламасын былтыр осы R&D орталығында өткізгенбіз. Экспертиза осы жерден алдық. Бірігіп оқу бағдарламасын бірге жасадық. Қазір қыркүйек айынан бастап 21 студент қабылдадық. Енді бірге дайындаймыз. Студенттер барлық практикаларын осы жерден өтеді.

Әлижан Төлембаев, Ғылыми орталық директорының бірінші орынбасары:
- Белсенді оқу процессі енді қалыптасатын болады. Бұл жерде біздің мамандар дәріс өткізеді. Яғни мұнда жастар барлығын өз қолдарымен ұстап көріп, дрондарды өздері жинайтын болады. Менің ойымша, студенттер үшін бұл үлкен мүмкіндік. Себебі қазір бұл сала қарқынды түрде дамып жатыр.