“Сүйкімді әрі арзан шешім“ әуежайдың ерекше қызметкерлері “көрікті жерге“ айналды

Қытайдың Ланьчжоу Чжунчуань әуежайы әлеуметтік желі қолданушыларының назарын ерекше "қызметкерлерімен" аударды. Мұнда кеміргіштер мәселесін шешуге көмектескеннен кейін әуежай қызметкерлері қамқорлығына алған мысықтар отбасы тұрады. Қазір үй жануарларының жеке шыны үйшігі бар, ал жолаушылар ұшар алдында оларды тамашалай алады, деп хабарлайды Tengri Travel SCMP басылымына сілтеме жасап.

Оқиғаның басты кейіпкерлері – Саньбяо есімді мысық, Цуйхуа есімді ұрғашы мысық және олардың маусым айында дүниеге келген Цуйго атты марғауы. Олардың баспанасы №58 отырғызу қақпасының жанында орналасқан. Әуежайда бұл жерді әзілмен "тышқандармен күрес кеңсесі", ал жануарлардың өздерін осы бөлімшенің қызметкерлері деп атайды.

Құрылыс алаңынан әуежай "қызметіне" дейін

Мысықтар отбасының тарихы әуежайдың жаңа терминалының құрылыс алаңынан басталды. Саньбяо мен Цуйхуа қаңғыбас мысықтар болған және құрылыс аяқталғаннан кейін де әуежай маңында қалып қойған.

Өткен жылдың екінші жартысында қызметкерлер жануарлар пайда болғалы кеміргіштер мәселесінің азайғанын байқаған. Мысықтарды қуып жіберудің орнына, оларды арнайы бөлінген жерде тамақтандыра бастаған, ал осы жылдың басында ресми түрде қамқорлыққа алған.

Кейін жолаушылар әлеуметтік желілерде жануарлар туралы видеолар жариялай бастап, мысықтар тез арада танымал болды. Желі қолданушылары оларды "әуежайдың тышқандармен күрес кеңсесінің қызметкерлері" деп атап кеткен. Осыдан кейін әуежай оқырмандарға үй жануарларына есім таңдауды ұсынып, олар үшін бөлек шыны үйшік салып берді және ветеринарлық күтім ұйымдастырды.

Саньбяо жаңа баспанаға көшер алдында кастрацияланып, вакцина егіліп, паразиттерден тазартылды. Маусым айында Цуйхуа ветеринарлық емханада кесарь тілігі арқылы Цуйго есімді марғауды дүниеге әкелді, содан кейін мысық пен марғау Саньбяомен бірге орналастырылды.

Шыны үйшік және таңғы аралау

Отбасы үшін шыны қабырғалары бар жеке кеңістік жабдықталған. Ішінде желдету жүйесі, су ішетін ыдыс және ойын кешені бар. Жануарларға әуежай қызметкерлері бекітілген, олар күтім жасап, олардың күнделікті өмірінен фотосуреттер мен видеоларды үнемі жариялап тұрады.

Instagram-дағы бұл жарияланымды көру

South China Morning Post (@scmpnews) жарияланымы

Сонымен қатар бұл ерекше "жұмысшылардың" нақты практикалық міндеті де бар. Таңертең ерте, жолаушылар әлі аз кезде, екі ересек мысықты аумақты қысқа уақытқа аралауға шығарады. Әуежай мәліметінше, "тышқандармен күрес кеңсесінің директоры" деп аталатын Саньбяо мен "директордың орынбасары" лауазымын иеленген Цуйхуа жүк конвейерлері, асхана асүйлері мен кеміргіштер пайда болуы мүмкін қойма үй-жайлары маңын күзетіп шығады.

Әуежай өкілдерінің айтуынша, мысықтар қамқорлыққа алынғаннан бері егеуқұйрықтардың қайта қаптау жағдайлары тіркелмеген. Соның арқасында өткір иісі бар кеміргіштерді жою құралдарын жиі қолдану қажеттілігі де жойылды.

Instagram-дағы бұл жарияланымды көру

Joe Chen (@jchen_grc) жарияланымы

Жолаушылардың ерекше "қызметкерлерге" реакциясы

Мысықтар отбасы бірте-бірте әуежайдың ең танымал ерекшеліктерінің біріне айналды. Жолаушылар жануарларды суретке түсіру немесе жай ғана тамашалау үшін шыны үйшіктің қасына жиі аялдайды. Ал әуежай мен саяхатшылар жариялаған видеолар мен фотосуреттер желіде үнемі көп қаралым жинап, қызу талқыланады.

"Мен әуежай бұл қаңғыбас мысықтарды қуып жібереді немесе жай ғана көз жұма қарайды деп ойлаған едім. Оның орнына оларға жайлы төсектер жасап, жаңа піскен тамақпен қамтамасыз етіп, тіпті арнайы шыны үйшік салып беріпті. Ланьчжоу әуежайы жарайсыңдар!", "Әуежай кішкентай жануарларға деген жылы қарым-қатынасы мен қамқорлығы үшін қосымша мақтауға лайық", "Әлемдегі ең үздік қызметкерлер", "Кеміргіштер мәселесінің ең сүйкімді, арзан әрі тиімді шешімі", "Барлық әуежайда мысық патрульдері пайда болуы керек", - деп жазды желі қолданушылары пікірлерде.

Сонымен бірге,қолданушылардың бір бөлігі бұл жарияланымды жануарларды қорғауға қатысты кеңірек мәселелерді талқылау үшін пайдаланды. Пікір қалдырушылар мысықтардың қауіпсіздігіне тілектес екенін білдіріп, олардың стерилизацияланған-стерилизацияланбағанын сұрады, сондай-ақ жануарларды қорғау шараларын күшейту қажеттілігі туралы ойларымен бөлісті.

Тағы оқыңыз: Қазақстанда ұшаққа тексерусіз міне алатын жолаушылар аталды

Google News арқылы жаңалықтарымызды қадағалаңыз

Жазылу