Талғарда техногендік сипаттағы төтенше жағдай жариялануы мүмкін

Тиісті шешім жобасы 2026 жылғы 22 сәуірге дейін қоғамдық талқылауға шығарылған. Құжат «Қазақстан Республикасындағы жергілікті мемлекеттік басқару және өзін-өзі басқару туралы» заңның 33-бабына, «Азаматтық қорғау туралы» заңның 48-бабына және ТЖМ-нің төтенше жағдайларды жіктеу туралы 2023 жылғы 10 мамырдағы №240 бұйрығына сәйкес әзірленген.

– Жобаға сәйкес төтенше жағдайды Талғар қаласы Асан Қайғы көшесі, 8/1 ғимараты мекенжайы бойынша жариялау ұсынылады. Бұл шешім аудандық төтенше жағдайлардың алдын алу және оларды жою жөніндегі комиссияның 2026 жылғы 21 сәуірдегі кезектен тыс отырысының хаттамасына негізделген, – делінген құжатта.

Бастаманың негізгі мақсаты – орын алған оқиғаның салдарын жедел жою және әрекет етуші қызметтердің жұмысын үйлестіру.

– Қабылданатын шешім төтенше жағдай салдарын жоюға және тиісті қызметтердің үйлесімді әрекетін қамтамасыз етуге бағытталған. Жобаны іске асыру әлеуметтік-экономикалық немесе құқықтық тұрғыдан теріс салдарға әкелмейді, – деп атап өтілген.

Айта кетейік, бұған дейін СҚО-да көктемгі су тасқынының екінші толқыны өтіп жатқаны хабарланған болатын.