Таразда мектеп оқушылары тоғызыншы сынып оқушысын топ болып соққыға жыққан

Жақындарының айтуынша, қызға жеті оқушы қыз шабуыл жасаған. Олар кастет қолданған. Соққыдан кейін мектеп оқушысы екі күн бойы жансақтау бөлімінде жатқан, деп хабарлайды Arasha.kz. 

Жасөспірімнің туыстары шабуылдан кейін күдіктілердің туыстары тарапынан өздеріне қорқыту сөздері айтылып жатқанын мәлімдеді.

«Біз бұл мектепке жақында ғана ауысқан едік. Бір топ оқушы қыз қызымды кастетпен ұрып-соқты. Заң қайда?» — дейді видеодағы әйел.

Жамбыл облысының Полиция департаменті қылмыстық іс қозғағанын хабарлады. Полицейлер төбелеске қатысқан барлық қыздардың анықталып, полиция бөліміне жеткізілгенін мәлімдеді.

Ведомствоның мәліметінше, мектеп оқушыларының ата-аналары кәмелетке толмағандарды тәрбиелеу жөніндегі міндеттерін тиісінше орындамағаны үшін жауапкершілікке тартылған.

«Жасөспірімдердің әрекеттерін кәмелетке толмағандардың істері жөніндегі комиссия қарады. Олар профилактикалық есепке қойылды», — деп түсіндірді полицейлер.

Бұған дейін Қарағандыда жасөспірімдердің мектеп оқушысын топ болып ұрып-соққаны туралы хабарланған еді.