Тарихи оқиға: Мелания Трамп БҰҰ Қауіпсіздік кеңесі отырысына төрағалық етеді

АҚШ президенті Дональд Трамптың жұбайы Мелания Трамп 2 наурыз күні БҰҰ Қауіпсіздік кеңесінің отырысына төрағалық етеді. Бұл туралы X әлеуметтік желісінде АҚШ-тың БҰҰ жанындағы тұрақты өкілі Майк Уолтц хабарлады.

«Мелания Трамп АҚШ-тың бірінші ханымы ретінде алғаш рет Қауіпсіздік кеңесінде төрағалық етеді — әрі бұл Америка кеңестегі төрағалығын бастаған алғашқы күні болады», деп жазды ол. «БҰҰ-ны қайтадан ұлы етейік!», деп қосты Уолтц.

Мелания Трамптың кеңсесінде оның баяндамасы «Қақтығыс жағдайындағы балалар, технологиялар және білім беру» тақырыбына арналатыны нақтыланды. Негізгі басымдық білім беруді әлем бойынша төзімділік пен бейбітшілікті ілгерілетудің құралы ретінде қарастыруға беріледі.

Мелания Трамп бұған дейін Ресейдің Украинаға қарсы басқыншылығы барысында әкетілген украиналық балаларды Киевке қайтару мәселесін қолдап сөйлеген еді.

«БҰҰ өкілінің мәліметінше, бұл 15 мүшеден тұратын Қауіпсіздік кеңесінің отырысына қазіргі әлемдік көшбасшының жұбайы алғаш рет төрағалық ететін жағдай болмақ», деп хабарлады Reuters агенттігі.

Әдетте Қауіпсіздік кеңесінің отырыстарына ротация бойынша елдің елшісі немесе жоғары лауазымды министрі төрағалық етеді.

Бұрынғы АҚШ бірінші ханымы Элеонора Рузвельт БҰҰ аясында Адам құқықтарының жалпыға бірдей декларациясы жобасын әзірлеуге атсалысқанын The Guardian газеті де еске салды.

Айта кетейік, ақпан айының басында Мелания Трамп туралы фильмнің премьерасы көрерменсіз өтіп, сәтсіздікке ұшырады.