Телефон алаяқтығына қарсы жасанды интеллект енгізе бастады

Қазақстанда телефон алаяқтығына қарсы күресте жасанды интеллект (ЖИ) технологияларын енгізу басталды. Бұл бастаманы Қазақтелеком жүзеге асыруда.

Компания басқарма төрағасы Бағдат Мусиннің айтуынша, арнайы бағдарламалық жүйе күмәнді қоңырауларды анықтап, оларды тексеру үшін арнайы колл-орталықтарға бағыттайды. Бұл орталықтар Қазақстан Бас прокуратурасымен бірлесіп құрылған.

Қазіргі уақытта жүйе алаяқтық қоңыраулардың шамамен 6%-ын тоқтатып отыр. Дегенмен толық қамту үшін техникалық қуатты бірнеше есе арттыру қажет. Осыған байланысты компания ЖИ негізіндегі модельдерді әзірлеуде.

«Болашақта жасанды интеллект қоңырауларды автоматты түрде өңдеп, азаматтарды алаяқтардан қорғауды күшейтеді», – деді Бағдат Мусин.

Жоба Ұлттық банк жанындағы антифрод орталықпен бірлесіп жүзеге асырылуда. Ведомствоаралық өзара іс-қимыл Президент тапсырмасы аясында жолға қойылған.

Мамандардың айтуынша, телефон алаяқтығына қарсы күрес үздіксіз жаңартуды талап етеді, өйткені қаскөйлер жаңа технологияларға тез бейімделеді.