Тікұшақпен түрмеден қашқан қылмыскер күтпеген әрекетке барды

Қырғызстан президенті кешірім берген вебкам-студиялар желісінің негізін қалаушы Даниэль Ажиев қайтадан ұсталды, деп хабарлайды Arasha.kz.

Қырғызстанның күштік құрылымдарындағы дереккөздердің мәліметінше, 6 наурыз күні Ажиевті Тоқмақ қаласында достарымен бірге демалып жүрген кезде милиция қызметкерлері ұстаған. Алдын ала ақпарат бойынша, тінту барысында одан есірткі табылған. Алайда ұсталуына нақты не себеп болғаны әзірге белгісіз.

Еске салайық, бұған дейін Ажиев әлеуметтік желілерде тараған резонансты видеоға байланысты қоғам назарын аударған еді. Видеода Қырғызстандағы колония маңынан тікұшақтың ұшып шыққаны көрсетілген. Кейін ол тікұшақпен Петровка ауылындағы №8 түзеу мекемесінің аумағынан дәл осы Ажиев кеткені туралы ақпарат тараған.

Қырғызстанның Төтенше жағдайлар министрлігі тікұшақтың ұшқанын растағанымен, оны Ажиевтің өзі емес, басқа адам жалға алғанын мәлімдеген.

Кейін Қырғызстан президенті Садыр Жапаров Ажиевтің түрмеден шыққаннан кейінгі әрекетіне таң қалғанын айтқан.

"Оның анасы жылап, өте қиын жағдайда екендерін айтты. Ал ұлы болса түрмеден шығу үшін тікұшақ жалдап жүр. Сол кезде мен: "Демек, мені алдап кеткен екен" деп ойладым", – деген Жапаров.

Президенттің айтуынша, бұл туралы хабар жеткен бойда ол тікұшақты кері қайтаруды бұйырған.