Тоғанас ауылының тұрғыны цех ашып, кәсібін табысты жүргізіп отыр

«AMANAT» партиясының «Ауыл аманаты» жобасы аясында өз кәсібін сәтті бастаған кәсіпкерлердің бірі – Ақмола облысы Ұлан ауданы Тоғанас ауылының тұрғыны, көпбалалы ана Меруерт Токунтаева. Ол жоба арқылы 2,5 пайыздық жеңілдетілген несие алып, 9 миллион теңге көлемінде қаржылай қолдауға ие болған, – деп хабарлайды Aikyn.kz.

 Алған қаражатқа сүт өнімдерін өңдейтін шағын цех ашып, бүгінде ауыл тұрғындарына табиғи әрі сапалы өнім ұсынып отыр. Кәсіпкердің айтуынша, оның өндірісінде күн сайын айран, құрт, май, ірімшік қақталған шұжықтар сияқты дәстүрлі тағамдар дайындалады.

Табиғи таза өнімге деген сұраныс жоғары. Меруерт өз өнімдерін «Үй дәмі» атауымен қала дүкендерінде және жәрмеңкелерде сатады. Бұл бренд – ауылдың еңбегі мен қазақтың дәстүрлі дәмін насихаттайтын айрықша атау болып отыр.

«Біз жолдасымыз екеуміз ауылға келіп өз кәсібімізді бастауға шешім қабылдадық. «Ауыл аманаты» жобасы бастамамызды  жүзеге асыруға мүмкіндік берді. Алдағы уақытта өндіріс көлемін арттырып, жаңа жабдықтар сатып алуды және өнім түрлерін көбейтуді жоспарлап отырмыз», – дейді кәсіпкер Меруерт Токунтаева.

Ол  өз кәсібін дамытып қана қоймай, ауылдастарын да жұмыспен қамтып отыр. Бұл ауылдағы әлеуметтік белсенділікті арттыруға және жергілікті экономиканы дамытуға зор үлес қосып жатыр.

«AMANAT» партиясының «Ауыл аманаты» жобасы – ауыл тұрғындарының табысын арттыруға, ауыл шаруашылығын дамытуға және ауылдағы кәсіпкерлікті қолдауға бағытталған бастама. Меруерт Токунтаеваның жетістігі – осы жобаның нақты нәтижесінің көрінісі.

Сараптама, зерттеу мақала, күнделікті өзекті ақпаратты «Айқынның»  TELEGRAM арнасынан табасыз.