Тоғыз жастағы қызылордалық жыршы 30 шақты термені жатқа біледі

Айарудың қазақтың ұлттық аспабына әуестігі кішкентай кезінде-ақ байқалған. Қолына түскен кез келген нәрсені домбыра сияқты тартып, ыңылдап жүреді екен. Отбасында киелі өнер жолына түскен ешкім болмаса да баланың бойындағы талантты байқаған әжесі оны алты жасында ауылдағы Жиенбай жырау үйірмесіне ертіп апарды. Содан бері Айару дәстүрлі өнерді дәріптеп жүр. 30-ға жуық термені жаттап алған, оны 10 шақты мақамда орындай алады.

- Маған Сыр сүлейлерінің ішіндегі шоқтығы биік Жиенбай жыраудың «Сөйлеші, тілім, сөйлеші», Омар Шораяқұлының «Жастарға өсиет», «Өрен жүйрік», Наурызбай Айтуарұлының «Сөз сөйлейін термеден», Тұрмағамбет Ізтілеуұлының «Қайратты туған ер болсаң» атты жыр-дастандары қатты ұнайды. Ата-бабамыз терме арқылы күнделікті өмірде кездесетін жағдайларға байланысты ақыл-кеңес беріп, жастарға өнеге айтып, жақсылықты насихаттап отырған, - деді жас жыршы.

Ұлттық болмыс пен тарихты ұштастырған саф өнер кейіпкерімізге үлкен атасы Рысбайдан дарыса керек. Ол есімі Ешнияз, Оңғар, Тұрымбет жыраулармен қатар аталатын Даңмұрын жыраудың қызынан туған екен. Қанмен дарыған өнерді Айару ізденісімен, еңбегімен жалғастырып жүр. Ол бұған дейін талай жыр додасында топ жарып үлгерді. Үлкен-кіші сахналарда өнер көрсетіп, облыстық, республикалық және халықаралық байқауларда қатарынан озық екенін бірнеше мәрте дәлелдеді. «Шәкіртсіз ұстаз тұл» демекші, оның тұғыр биігінен көрінуіне ұстазы Дінислам Тоқсанбаевтың сіңірген еңбегі зор.

- Айарудың талабын танып, біздің үйірмеге Дараш әжесі әкелген болатын. Бүгінде ол ата-әжесінің, әке-шешесінің, бәріміздің үмітімізді ақтады. Айару жыр-термелерді бірден жаттап алады. Шәкіртімнің болашағынан үлкен үміт күтемін, - деді ұстазы.

Айару болашақта өзінің кім болатынын айқындап қойған. Арманы — атадан балаға мирасқорлық жолмен жалғасып келе жатқан жыршылық өнерді жаңғыртып, жаңа биікке көтеру.

Бұған дейін біз Түркістан облысы Қазығұрт ауданының Алтынтөбе ауылында екі таңбалы және тіпті үш таңбалы сандарды ойша есептей алатын және көбейту амалдарын ағылшын тілінде еркін орындайтын төрт жастағы бала өсіп келе жатқанын жазған едік.