Трамп хуситтердің Сауд Арабиясына теңіз блокадасын бастау туралы мәлімдемесіне жауап берді

АҚШ президенті Дональд Трамп йемендік хуситтердің Сауд Арабиясына теңіз блокадасын жасау туралы қоқан-лоқысына қатысты пікір білдірді, деп хабарлайды Tengrinews.kz Fox News басылымына сілтеме жасап.

Трамп "Ансар Аллах" қозғалысы содырларының Қызыл теңізді қоршауға алу әрекетін жоққа шығармады, алайда бұл әлі жүзеге аспағанын атап өтті. Сондай-ақ ол мұндай жағдай болса, АҚШ-тың мәселені реттейтініне уәде берді.

"Не болатынын көре жатармыз. Бұл әлі болған жоқ. Болуы мүмкін, бірақ біз мұны қамтамасыз етеміз. Егер соған ұқсас жағдай орын алса, біз бәрін шешеміз", - деді Ақ үй басшысы Ливан президенті Джозеф Аунмен кездесуінде журналистердің сауалына жауап бере отырып.

"Біз бұған дейін хуситтермен осылай істегенбіз", - деп қосты Трамп оларға қарсы іс-қимылдарды меңзеп.

Күні кеше йемендік хусит көтерілісшілерінің "Ансар Аллах" қозғалысының әскери өкілі Яхья Сариа "көзбе көз" қағидаты бойынша Сауд Арабиясына дереу теңіз блокадасын бастайтынын жариялады.

Мәлімдемеде бұл қадам Йеменнің "жалғасып жатқан саудиялық блокадасына" жауап екені айтылған. Сария Эр-Риядты порттар мен әуежайларды көп жылдар бойы жауып тастады және теңіз, құрлық және әуе шектеулерін енгізді деп айыптады.

Мәлімдемеде хуситтер оқиғаның кез келген бағытта өрбуіне дайын екені және Сауд Арабиясы тарапынан шиеленіс болған жағдайда қатаң жауап қайтару құқығын өзіне қалдыратыны баса айтылған.

Сауд Арабиясы бастаған коалиция Баб-эль-Мандеб бұғазындағы кемелерге қауіп төндірген хуситтерге қарсы батыл шаралар қолданатынын айтып, сес көрсетті. Бригадалық генерал Турки аль-Маликидің мәлімдемесінде коалиция қолбасшылығы "Баб-эль-Мандеб бұғазы арқылы өтетін сауда кемелерін қорғау шараларын жүзеге асыруды бастағаны" және "өтіп жатқан кемелерге қатысты хуситтердің қоқан-лоқысына батыл әрі қатаң жауап берілетіні, өйткені бұл халықаралық құқықты айқын бұзу және қарақшылық ретінде бағаланатыны" айтылған.

Google News арқылы жаңалықтарымызды қадағалаңыз